RSO Nih Thazang 1,000 Hrawng In AA A Doh
The Chinland Post | 2024 September 10 — Rakhine ram, Buthidaung, Maungdaw hmunhma ah AA cu thazang 1,000 hrawng in SAC he fonh in kan doh hna tiah Muslim hriamtlai phu a si mi RSO nih a thanh.
RSO upa a si mi U Ko Ko Lin le Reuters ton biaruahnak ah a chim mi a si tiah Reuters nih September 6 ah a langhter.
RSO hi thazang 6,000 hrawng an um i cu chung ah 1,000 hrawng nih AA an doh nain an kir ṭhan tiah RSO upa U Ko Ko Lin nih cun a chim.
AA doh ding in SAC le RSO karlak ah theihthiamnak an la tiah RSO lei nih cun an chim.
AA nih Rakhine ram chung ah “ARAKAN ARMY” phu lawng a um lai tiah a rak thanh bal cang i Rakhine ram chung ah a um mi SAC ralkap le adang hriamtlai phu pawl a ṭhawl hna hi a si.
Rakhine le Bangla ramri ah a um mi Buthidaung, Maungdaw, Rathedaung hmunhma hna cu 2017 ah SAC ralkap nih Special Operation min in Muslim 1million leng a rak ṭhawl hna i Muslim a za leng a bu in a rak thah hna tiah UN telh in vawlei cung nuhrin covo phu pawl nih an chim.
Muslim hriamtlai phu pawl nih an kah doh ti mi tlangtar in SAC ralkap nih Operation a tuah i a ṭhawl hna hnu ah Muslim hriamtlai phu a si mi RSO, ARSA hna cu ralhrang phu tiah a thanh hna.
Asinain atu ah, Muslim hriamtlai phu a si mi RSO, ARSA le ARA cu ralhrang phu an si tiah a cohlang tu SAC ralkap he bawm in AA an kah hi a si.
AA Commander in Chief Twan Mrat Naing nih Muslim pawl nih Rakhine ram chung ah an um khawh a si ko nain hriamtlaihnak, hramhram in thiltuah le SAC he bawm in kahdohnak an tuah ahcun kan cohlang lai lo i kan doh ve ṭhan hna lai tiah Irrawaddy thawngzamh he biaruahnak ah fiang tein a chim.
Muslim hriamtlai phu a si mi RSO nih Buthidaung, Maungdaw hmunhma pawl cu Muslim pawl caah mah tein khuakhan lairelnak le mah tein i uk khawh nak hmun ah ser ding timi ruahchannak he 1982 ah an rak dirh i a rawk deng tiah ngiathlai tu pawl nih an chim.
Asinain thazang 1,000 hrawng in 2022 kum ahcun thazang 5,000 in 6,000 karlak tiang an samh khawh i chungtel zapi in hriam an tlai kho rih lo RSO upa U Ko Ko Lin nih cun a chim.
RSO, ARSA le ARA nih an thazang caah Bangladesh um Muslim ralzaam sakhaan pawl le Buthidaung, Maungdaw hmunhma mino pawl an khawmh hna.
Muslim pawl nih hin Arakan Army an rem lo nain RSO nih ralkap a khawmh mi cung ah an lungtling lo tiah International Crisis Group nih August thla report ah an langhter.
About The Author
