Ruah a tuh le thli a hran tuk ruangah CDF-Mindat sakhaan cheukhat a rawk
The Chinland Post | 2022 May 2 – Chinland Defense Force-Mindat sakhaan pawl cu ruah fak tuk in a sur ruang le thli a hran tuk ruangah voi hnih tiang a rawk tiah thawng theih a si.
“April 19 ah a voikhatnak ruah a sur i a rawh dih caah kan rak remh ṭhan. Cun April 29 ah ruah a teh ṭhan caah a rawk dih ṭhan. Ruah voihnih te lawng a sur rih ko nain eiding rawl le ihnak ding caah ruah le thli a kham mi zeihmanh kan ngei lo. Mah hmanh hi fur a tla rih lo. Atu bantuk in fur kan phak ahcun a fawi lai lo, ralram in a rak kirmi kan mipi hriamtlai hna caah dinhnak ṭha a um lo. A rawk cangmi ruahkhamnak (mu-ka) pawl zong hman ṭhan awk an ṭha ti lo. Chanphio tel hin cun sak ṭhan kan i timh ko. A tung pawl caah cun kan mino hna an i manh caan ah an ah tawn. A lamkip in bawmhnak kan pe hram ko uh” tiah khuami pakhat nih Zalen ah a chim.
