Ruahsur Tilianh Ruangah Hpakant Khua In A Thimi Le Harnak Tongmi A Thong Leng Kai An Si Cang

0

TCP-Online| 2018 July 5| July thla hramthok in Kachin ramkulh Hpakant khua ah ruahsur le tilianh nakin hlei cheukhat ti nih a khuh hna, minung umnak inn tampi zong ti nih a khuh chih. Hi ruah sur le tilianh nakin a thimi zong an um cang i Hpakant ah minung thong 2 leng le Lungkhin ah mi thong khat leng cu umnak ngei lo le harnak tong in an um tiah Hpakant peng Pyithu hluttaw palai U Tin Soe nih a chim.

“A luancia nihnih hrawng khan Hpakant ah hin ruah a sur i ti zong a lian. Ti a lianh ning cu khuaruahhar ngai khi a si. Hpakant khuachung vialte ti nih a khuh dih ti awk khi a si. Lungkhin khua ah cun Bila hlei le Hpakant ah hri in tuahmi hlei zong ti nih a khuh chih. Chawva in sunghnak a tongmi zong an tam. Bazar tampi zong ti nih a khuh. Mahti tilianh hi minung ih lio caan zan a si tikah sunghnak zong a tam khun” tiah a chim.

“A minung zat in harnak a tongmi cu Hpakant khua in minung 2200 leng le Lungkhin khua in minung thong khat leng an si. Mahti harnak a tongmi zong cozah lei nih bawmhnak pek dingin timhlamh cuahmah lio a si” tiah Pyithu hluttaw palai U Tin Soe nih cun a chim.

Ruahsur le tilianh ruangah vawlei zong a min i minung a thimi 5 leng an si cang, a tlaumi zong an um rih tiah Hpakant khuami nih cun an chim.

Hpakant ah sui khur a cotu hna zong an umnak a him khawn nakding Company lei zong nih biatakte in tuanhma an laak hna. Kachin ramkulh Hpakant ah atu zong ruah cat loin a sur peng rih caah atu nakin ti a lianh deuh sual cun harnak fak tuk in a tong kho ding dirhmun a si caah Hpakant khua minung pawl cu thinphang dai loin an um lio a si.

Ref; VOA

About The Author

Na ruahning rak langhter ve.. (Leave a comment)

%d bloggers like this: