Rung Lian Ceu; 100% Bak In Teinak Hmuhding Hi Ka Thlacamnak Le Kaa Zumh Bakmi A Si

0

The Chinland Post| 2019 March 6| Thaizing paih dingmi kong ah zeitluk in dah zumhngamhnak an ngeih timi kong he pehtlai in The Chinland Post nih Pu Ang Cung le Rung Lian Ceu biahalnak kan ngeih hna.

“Zakhat ah zakhat (100%) bak in ka tei hna lai ti kaa zumh, kaa ruahchan fawn. Anmah paih phunglam zong a kan cawnpiak i kaa fiang tuk cang i zeihmanh phan awk a um ti lo. Pu Ang Cung nih a ka sawm cangka in ka thlacamnak zong ah ka telhmi le ka camchihmi a si. Tutan i kaa paihnak a ruang bik cu laksawng nakin kan Lai Paih thancho duh le teinak hmuh duh ah a si bik ko. Ka chan chung ah Laimi chung in miphun dang le ramdang ah a hmasa bik i paih le teinak hmuh kaa timh ruang zong ah a si fawn” tiah March 6 zan ah Rung Lian Ceu nih The Chinland Post ah a chim.

“Nagaland khualipi Kohima kan phak hnu ah Gym ah voihnih kan kal. Paih cawnnak ah voihnih kan kal. Champion hlun kum 40 renglo a simi cawnpiaktu ding (coach) ah a kan pek. An cawn lio ah minute pakhat kan i tlai taktak tuah lai tiin Rung Lian nih a ti i an i tlai i a tengh colh ko. Mah coach pa nihcun na thawng bak si, paih zong na thiam a ti. A nihnihnak cu a cawnpi ngam ti lo i midang- nikum 1st runner nih a cawnpi. Cuti a cawnpinak ah Rung Lian nih a tengh i a ke aa khawn. Cu pa zong nihcun Rung Lian hi 100% a zumh. Kan in tei bal lai lo. Nikum kan pathawng bik pahnih nihcun an tei kho lai ti ka zum bak lo, a ti. Venezu hi anmah coach nih an tihpiak pah, midang cu an tihpiak bak hna lo. Pakhatnak a si lo hmanh ah final cu a phan hrimhrim lai tiah zakhat ah zakhat ka zumh” tiah Pu Ang Cung nih The Chinland Post ah a chim.

“Hakha lei kan naule hi ka zumh ngai ve ko hna. Hakha i a thiam bakmi le a thawng bak vemi an si caah tih awk cu a um lo. An rak phak a hnu deuh i an paih phunglam kong ah chambaunak an ngei te sual lai ti hi tlawmte cu ka thin an phang. A ruang cu kan paih phunglam aa dan tuk ruang ah” tiah a biapeh ah a chimchih.

Payper view Live hi Vanmi Productions nih an thlah lai. Live thlahnak ding Internet package zong anmah Kohima khuapi chung I a tha bikmi line (network) an hman lai caah line kong ah thinphan awk a um lai lo. PPV cawk a duhmi paoh nih www.vanmiproductions.net ah USD 60 in cawk khawh a si.

Nikum an champion pa le Rung Lian Ceu cu nihin anmah Naga festival puai an tuahnak hmun ah an i tong i hmanthlaktinak zong an ngei kho. Naga champion pa hi a khan cu a sang taktak nain, Rung Lian Ceu bantuk in a taksa a benh lo tiah theih a si.

Rung Lian Ceu hi anmah Naga khuami zong nih an uar taktak. Champion co ding ah an zumh ngai cio. Paih committee nih ramdang um pathawng Rung Lian Ceu kan sawm khawh an ti i an i chawr ngaite. Rung Lian Ceu aa telnak thawng in Naga paih hi mizapi nih zoh duhnak an ngeih deuh cang. A ruang bik cu anmah Naga paih committee hrimhrim nih an zumh tuk ruang ah paih sawmnak le fakthanhnak tuahnak caah an hman. Anmah Kohima khuapi chung ah anmah Naga pathawng pathum le amah Rung Lian Ceu fakthanhnak hmanthlak hi lamkam kip ah an tar thluahmah hna tiah theih a si.

Tutan Naga paih zuamnak ah kanmah Chinmi in aa pai dingmi hna cu; Rung Lian Ceu, Thawng Tling, Mang Hnin Thang, Tluang Zel Thang le Hrang Tin Thang an si.

March 7, India ram Naga ah tuahdingmi zuamcawh paih zuamnak ah aa pai dingmi minung 59 lakah Chinmi 5 an i tel.

March 7 ah aa pai dingmi minung 59 nihhin vote an zuh cio lai i aa tongmi paohmi an i pai lai. Lai le Lai vote zuh in an i ton sual zong ah an i pai ko lai. Vote zuh le zuamcawh bak in i paih a si lai. Sungh sual ahcun paihnak nawl ngeih a si ti lai lo. Awn thluahmah ahcun final phak in champion co khawh a si lai tiah kan theih.

An i paih caan cu anmah India caan in March 7 zingka suimilam 9:00 in zanlei 4:00pm tiang a si lai. US lei caan in cun March 6 zan suimilam 10:30 in an thawk lai. Kawlram caan in cun March 7, suimilam 10:00am in an thawk lai.

About The Author

Na ruahning rak langhter ve.. (Leave a comment)

%d bloggers like this: