Rung Lian Ceu Hi Hakha Zatlang Le Zuamcawh I Bual A Co Caah World Champion Taktak A Si Cang
City Hunter| 2018 February 20| Hakha ah tuahmi Chin Miphun Ni ah US in a rak tlawngmi Rung Lian Ceu nih zatlang paih le zuamcawh paih i bual a co caah world champion taktak a si cang tiah kan theih. Champion a conak, Hakha zuamcawh aa paihnak le laksawng a laaknak hmanthlak tampi kan hun in hrawmh chih hna. Rak rel in rak zoh cio ve uh.
Hi kong he pehtlai in World Paih Champion phu in haotu Pu Ang Cung nih, “US lawng ah si lo in Chinram khualipi Hakha zong ah bual a co caah Rung Lian Ceu cu Chinmi dirhmun in World Champion taktak a si ko cang. Tutan Hakha he hin nisunglawi ah voi 11 aa pai i voi 9 champion a co cang” tiah The Chinland Post ah a chim.
February 19 ah tuahmi Hakha- Zatlang paih ah Rung Lian Ceu nih minung 6 a tei hna hnu ah bual a co beh. February 20 ah tuahmi a phuphu paih cu aa pai lo. Zuamcawh paih ah aa pai than. Final ah Hakha Khuathar in Tawk Hre he an i pai i Rung Lian Ceu nih khelhnih ningte in a thlak i a tei caah champion a co than. Zatlang paih i a tengmi hna le zuamcawh i a tenghmi hna hi zoh tikah minute pakhat asilole pahnih chung ah fawi tuk in a vawr hna, a tengh colh hna.
Zuamcah final aa paih lio tu cu minute 6 hrawng a rau. Aa paih lai ah upa pakhat sin ah a chimtakmi bia cu mizapi an i nuamhnak ding ah minute 10 chung in ka paih pi lai tiah biathli a cahtak tiah kan theih. Zuamcawh ahhin minung 3 lawng a tei hna hnu ah Tawk Hre hi a donghnak bik an i ton hi a si. Zatlang he group paih he zuamcawh he bual a rak comi Tluang Lian Thang cu zuamcawh ah aa pai duh lo. Cun zatlang paih zong ah aa pai duh lo. Cuti lo, Hakha Khuathar paih thawng deuh paoh cu Rung Lian Ceu nih a tengh dih hna. Nikum champion Thawng Tling zong zatlang paih ah fawi tuk in a tei.
“Atu bantuk teinak ka hmuhmi hi PATHIAN thawng in a si. Voidang zong ah PATHIAN nih lam a ka hruai i tutan zong ah teinak he lam ka hruai than caah kaa lawm. Laitlang pathawng pawl ka paih tik hna ahhin paih an thiam ngai. Asinain, ramkip dirhmun in teinak an hmuh khawhnak ding ahcun an i zuam deuh rih a hau” tiah Rung Lian Ceu nih a chim.
Rung Lian Ceu cu Hakha peng, Chuncung khuami Pu Si Hmung le Pi Tum Zing fapa a si. A chuahpi unau pa pathum le nu pahnih an si. Rung Lian Ceu hi 1994 July 3, Chuncung khua ah a chuak. 2006 December 16 kum ah Malaysia a phan. 2007 September 13 ah USA a phan. Atu hi Taxes, Amarillo college pakhat ah Automotive Technology (Auto-Technician Engineering) a kumthumnak a kai liopi a si.
Photo: The Chinland Post
About The Author
