Rung Lian Ceu; Lai Paih Phunglam In I Paih Ahcun Naga Miphun Nih A Kan Tei Lai Lo
The Chinland Post| 2019 March 7| March 7 ah tuahmi avoi 12nak Naga Open Wrestling paih ah Rung Lian Ceu nih champion a co khawh lomi ruang ah a ngaihchiat lonak le pathumnak a ngahmi cung ah aa lunghmuihnak kong The Chinland Post ah a chim.
Tutan Naga paih zuamnak kong he pehtlai in The Chinland Post biahalnak kan ngeih i atu bantuk in a kan leh.
“Tutan ah champion ka co khawh lomi cungah ka ngaihchia lo. Hi tiang dirhmun kaa paih khawhmi cung ah kaa lunghmuih tuk ko. Kan paih phunglam aa khah lomi ruang ah a si. Kanmah Lai paih phunglam in i pai usihlaw a kan tei lai lo. A hmasabik miphun dang le ramdang ah kan i paih khawhmi hi tuanbia thar pakhat kan tial a si ko cang” tiah a chim.
Hika ah Quarter final aa paihnak video zoh khawh a si.
“Tutan ah champion co ding in zakhat ah zakhat bak kaa tinh in kaa ruahchan ko nain ka ngah lonak a ruang bik cu kan paih phunglam aa khah lo ruang ah a si. Kan i paih sual lai ti kan phannak ah kan sung theu. Hakha lei ka hawile an sunghnak a ruang bik cu paih phunglam fiangte in an hngalh lo ruang le kan i paih bal lomi phunglam a si tikah an i ralrin tuknak ah an thinphang i an sunghnak a si. Asinain, tutan ah champion ka co lo zong ah kaa lungsi tuk ko, hi tluk dirhmun kan phak khawh ruang le tuanbia thar kan tial a si ruang ah” tiah a chimchap.
Ruang Lian Ceu cu Nagaland state khualipi, Kohima ah tuahmi avoi 12nak Naga zuamcawh paih ah pathumnak laksawng le paih thiam/paih dawh bik laksawng lawng a co. Rung Lian Ceu nih pathum laksawng anmah India tangka in Rs. 100,000 le Paih thiam bik (the best tactic wrestler) laksawng ah Rs. 10,000 a co. Kawlram tangka in cun Ks. Sing 22 (2,200,000) tluk a si.
Tutan Naga paih ah Chinmi minung 17 an kal kho. Chin Miphun nih miphun dang le ramdang ah a hmasa bik kan i paih a si. Paih a zohtu zapi hi minung thong 30 (30,000) hrawng an si. Paih hi alak in zoh a ngah lo, tangka liam in zoh a si. A niam bik Rs. 100 a si i Rs. 2000 in siseh, Rs. 1000 in siseh, Rs. 500 tibantuk in zohman laak an si tiah kan theih.
About The Author
