Tulio Vawleipi Hnintu Russia le Ukraine Buaibainak

0

Post Staff — 2022 February 16 — Atulio vawleipi thawngzamhnak tlangtar ah tampi kan hun hmuh khawh mi cu Russia le Ukraine kong le an buaibainak hi a hun si. Ram cheukhat cu an ram mi hna kha Ukraine in an ram cio kir ding ah thanhnak an tuah. A hlei in US, Europe ram pawl le India tbk. tiang in nawl chuah a si.

Hihi a thawknak hi caan sau a uam cangmi buainak a si. Nain, 2022 February 10 ah Russia ram President Vladimir Putin le Emmanuel Macron cu Moscow khua ah Ukraine le Russia karlak entainak kong he pehtlai in i ton le i ceihhmainak an ngei.

Cu ceihhmainak ahcun, Russia President Putin nih Ukarine ram cu North Atlantic Treaty Organization (NATO) ah aa fonh a si ahcun European Union (EU) le Russia cu raltuknak he pehtlai in buainak a chuak ko lai tiah a chim.

Russia le NATO cu hriamnam ṭhawnnak lei kan tah a si ahcun Russia cu chim awk tlak lo a si ko. Sihmansehlaw, Russia cu vawlei pumpi ah Nuclear hriam a ṭha bik lei a si le tuchan ah ram tampi nakin a ṭhawng deuh zong a si kha theih a si ko caah hohmanh nih teinak kan hmu lai lo tiah a chim chap.

NATO thil tuah cu Russia caah ṭihnung a si bantuk in Russia ram he aa naihniam mi Ukraine ram a bet chap hnikmi hrim hi Russia ram huhimnak a hnawr bantukin a fiang tukmi tlerhnak (threat) a si tiah a chim fawn.


NATO nih Russia cu EU caah ral a si tiah a hmuh bantukin Ukraine ram i kham khawhnak ding caah ralkap a thlah len.

Cu bantukin, Russia zong nih Ukraine ramri ah a ralkap a thong leng le a tank tampi he a naih lengmang lawng si loin, Putin biachim ah EU le NATO tlerhnak bia aa tel peng. Russia le Ukraine kar i entainak cu an bia lawng si loin nikhat hnu nikhat a fakchin thluahmah.

Ukraine ram hi NATO chungah chungtel tling sinak a ngei rih lomi a si.

Russia le Ukraine hi a hlan chan, 1600 in siseh, chanthar vawleipi ral pahnihnak hnu in 1991 Soviet Union ramkomh a thencheu hnu in, zalongmi ram pakhat sinak in a hung dir mi a si. Nihin, ah Soviet Union in ram thar sinak in a dirmi pawl ram cheukhat cu NATO chungtel an hun si lawng silo in, Ukraine zong hi luh ding bantuk le nitlak (west) lei ah pehtlaihnak a ngeih deuh caah Russia a thin a hun phan hi a si.

Cun, Russia lei in President nih cun Russia le Ukraine cu miphun pakhat kan si tiah a ruah. Cucaah, Ukraine cu Russia tang ah a um awk a si timi chimrelnak a hun ngei. Cucaah, Ukraine ram i hmun pakhat a simi Crimea zong hi Russia nih a rak lak cang. Cun, tutan buaibainak ahhin, Russia nih a ramhriam thatha le ralkap tampi cu Ukraine ramri ah a va chiah hna lawng silo in, Belurus he raltuk cawnnak tuah ti i, Ukraine ram ah umhmun khuar ter hna. 

Cuti a si ruang ah, Ukraine ram ahcun US le a hawi phu simi NATO nih Ralkap tampi cu an thlah ve. 

Ukraine ram ahhin, zatuak 12 (%) tluk nih Russia holh an hmang i, Russia miphun cithlak an si tiah theih a si.#

About The Author

Na ruahning rak langhter ve.. (Leave a comment)

%d bloggers like this: