Russia na bawmh ahcun phihkharnak na tuar lai tiah US nih China cu ralrin a pek
The Chinland Post | 2022 March 19 – Russia nih Ukraine a tukmi cungah China nih Russia thilri a bawmh (material support) a si ahcun hmailei caan ah harnak na tuar lai tiah American President Joe Biden nih China hruaitu Xi Jinping cu March 18 ah ralrinnak a pek.
Ukraine raltuknak he pehtlai in palai biaruahnak in tawlrel a herh tiah China le American nih biatak tein an ruah.
Zeibantuk harnak dah China nih a ton lai timi le “material support” hi zeidah a sawh duhnak a si timi bal cu White House nih fianternak a ngei lo nain a ngan tukmi chawleh lei pehtlaihnak a um lai tiah Minister of Information nih a thluamthlam a langhter.
Vawlei cungah a ṭhawng bik ram a simi American le China karlak a thuk tukmi remlonak a um lioah a chuakmi muilang i chawnhnak ah Russia cu phihkharnak tuah ding le American le a hawikom ram hna nih an i zuamnak pawl kong fiangte in an chim.
“Ukraine khua hna le mipi hna fak tukin a tumi Russia cu China nih material support a tuah a si ahcun hmailei ah harnak a tuar lai tiah President nih a chim” tiah White House cathanh ah a telh chih. President Joe Biden cu “Ukraine tuarinnak hi palai biaruahnak in tawlrel ding cu tha a pek tuk” tiah cathanh ah an telh chih.
China nih a tuar dingmi hi American lawng nih a tuahmi si loin vawlei pi lehrulhnak a ton lai tiah President Joe Biden nih a chim tiah American rianngan tlaitu pakhat nih a chim.
Ukraine raltuknak hi a rannak bik in a dih hau tiah Xi Jinping nih Joe Biden a chimh i Russia he ṭha tein biaruahnak tuah ding in NATO phu cu a forhfial hna tiah China Minister of Foreign Affairs nih a chim.
“A tulio a biapi bikmi cu ṭha tein biaruahnak tuah, mipi thihlohnak hrial, minung le minung kar i theihthiamnak in temhinnak kham, kahdeihnak le raltuknak a ran khawh chungin dihter hi a si” tiah Xi Jinping nih a chim.
Ref: Mizzima