SAC Central Command, Thla 2 Chung Ah Battalion Commander 8 Telh In Ralkap 128 Nih SAC An Chuak Tak
Salai Mangpau | September 4, 2023 — SAC Central Command tang, thla 2 chung ah Battalion Commander 8 telh in ralkap 128 nih SAC battalion chuah tak in an zaam tiah SAC ralkap chunglei nih an chim tiah People’s Spring News nih a langhter.
Karenni (Kayah) ramkulh hi SAC lei Central Command tang a um mi battalion pawl nih kahdoh an tuah cemnak hmun a si.
Ralkap phunglam/ zulhphung ah nawl loi n a leng chuah tik ah suimilam 2 hmanh um khawh a si lo caah CDM an tuah tiah ti khawh an si ti in ralkap Sergeant sin in theih a si.
Nawl lo in aleng ah a chuak mi, battalion a chuah tak mi, ralram ah a kal duh lo mi Central Command chung in Battalion Commander 8 cu dantatnak an ing lio, Commander a changtu ralbawi 16 cu nawl lo in an chuak, an zaam hna.
Nihin, Karenni ram ah ralhmai sial kalding in a ra mi Shan ram Southern lei SAC ralkap Battalion bu pakhat minung thazang nih a tlinh ti lo.
“ Hlan ah battalion pakhat nih ralhmai sial ding an kal tik ah hmai ah ralkap 80 a kal lai maw, hnu ah ralkap 60 an tang ta lai maw? Asilole hmai ah mi 60, hnu ah mi 60 tii n a rak si tawn. A tu ahcun battalion pakhat ah ralkap 80 lawng an um cang” tiah SAC ralkap Sergeant nih a chim.
August thla ah Shan ramkulh, Kalaw peng hrambunh LIB 55 kuttang um battalion pawl, Karenni ram chung Phasaung, Demoso peng chung kahdohnak ah SAC lei Commander ralbawi le ralkap tampi an thi.
