SAC he aa pehtlaimi Myanmar company 3 Britiain cozah nih phihkharnak a tuah
The Chinland Post | 2022 August 26 – Myanmar ram ah Rohingya puainak kum 5 a tlin ni August 25 ah Britain cozah nih SAC he aa pehtlaimi Myanmar hrambunh sipuazi rianṭuannak pawl cu phihkharnak a tuah ṭhan.
Britain cozah nih phihkharnak a tuahmi company pawl cu Star Sapphire Group of Companies, International Gateways Group of Companies Limited (IGG) le Sky One hna an si. SAC hriam le tangkaluhnak zorter deuh dingin phihkharnak kan tuahmi hi a si tiah Britain cozah nih August 25 ah a thanh.
Cathanh chungah Gambia le Myanmar i ICC biaceihnak zongah Britain nih teltumnak ding ruahchannak cu Asia he pehtlai in Britain Minister Amanda Anne Milling nih a fehter. Gambia ram nih tazacuainak cungah ICC nih SAC nih Rohingya cungah a buarmi hi miphun cihlohnak he aa pehtlaimi hnatlaknak a buar le buar lo kha bia a khiah lai.
2017 August 25 ah Rakhine ram chungah a ummi Rohingya miphun cu Kawl ralkap nih fak tuk in a rak tuk. UN report ah Rohingya 10,000 leng an rak thi i 74,000 a pawngkam ram ah an rak zaam.
Britain cozah nih 2017 thokin Rohingya ralzaam caah 330 million pounds a rak bawmh cang hna.
About The Author
