SAC Infantry 50 nih thazang tampi in kahdohnak an tuah caah zohfelnak gate pakhat kan sung: CDF-KKG

The Chinland Post | 2022 July 4 – Gangaw khua ah a ummi SAC Infantry 50 nih thazang tampi in kahdohnak an tuah caah zohfelnak gate pakhat kan sung tiah CDF-KKG nih July 3 ah a thanh.

June 1 zinglei sml 6:50am hrawng in Infantry 50 nih thazang 40 hrawng in CDF-KKG battalion 6 i zohfelnak gate (shungshi le Aungmin khua karlak) ah an rak rat hi a si tiah theih a si.

Cucaah CDF-KKG battalion 6, PDF Gangaw thlanglei phufonh he zinglei sml 7:20 am thok in sml cheu chung hrawng kahdohnak a chuak.

Thazang tampi le hriam tamtuk ruangah zohfelnak gate pakhat sungh a si ko nain Aungmin khuachung ah hmunhma a khuarmi SAC ralkap cu mipi hriamtlai phufonh nih kah kan i timh ko hna nain mipi pawl an i kham hna caah mission tuah a si ṭhan kho lo tiah a langhter.

Chun sml 11:00am hrawng ah nitlak lei battalion 706 nih (Hyper UAV Drone) nih kahdoh an kan bawmh caah SAC ralkap pawl cu Drone in bom thlak hnawh an si tiah CDF-KKG nih a thanh.

Aungmin khua in SAC ralkap pawl cu chun ah Oakphu khua lei ah an kal i CDF-KKG battalion 6, PDF Gangaw thlanglei phufonh he Sapaebagyi ramtang lam ah chikhat kahdohnak a chuak.

Chun sml 3:00pm hrawng ah Shoukpin khua in Hnankhin lei ah a kirmi SAC ralkap pawl cu Drone in kah an i si ṭhan.

Nikhat chung kahdohnak ah mipi hriamtlai phufonh lei in hliamhma a tuarmi an um lo nain SAC ralkap lei in hliamhma a tuarmi an um lai tiah ruahdamh a si.

SAC ralkap pawl nih mipi pakhat an tlaih i Shoukpin khuami phone zong an chuh dih hna tiah CDF-KKG thawngthanhnak in theih a si.

Na ruahning rak langhter ve.. (Leave a comment)

%d bloggers like this: