SAC Kuttang Central Bank Lubik Telh in Minung 44 Cu NUG Nih Ralhrang Cazin Ah A Khumh Hna
Salai Mangpau | September 15, 2023 — SAC kuttang Central Bank Governor Lubik telh in Bank rianṭuantu 44 cu ralhrang cazin ah khumh in dantat an si lai tiah NUG nih thawngthanhnak a tuah.
SAC ralhrang nih mipi thahnawnnak, khua tampi ah vanlawng in bomb thlak in thahnawnnak a tuah mi telh in ralhrang nih mipi sin kutthlak in a duhning paoh a tuah khawh nakhnga tangka lei a bawmchantu, ramdang in vanlawng datsi telh in mipi tampi tihnak hriamnan caw kho ding in SAC kuttang um Central Bank rianṭuantu Governor lubik telh in an zung rianṭuantu hna tuahsernak cu Myanmar ram mipi caah chiatnak tampi a chuahpi tiah NUG cathanh chung ah hmuh khawh a si.
SAC kuttang Central Bank lei nih ramchung thilri man le tangka kong ah fek tein policy tlaih le dinfelnak a tuah lo hlei ah ramchung ah a duhzat in tangka catlap a chuah ruang ah tangka man ngei lo dirhmun a phan cang i, thilri man a kai thluahmah, mipi lei ei-din, sii-man ah harnak tamtuk an tong, ramdang tangka thlen rate a tla kho ti lo tiah NUG nih a chim.
Myanmar Central Bank rianṭuantu lubik Governor Than Than Shwe, Director Generals, Deputy Director Generals, le Directors telh minung 44 hna cu ralhrang dohnak upadi pohma 14 ning in dantat an si lai tiah NUG nih a chim.
About The Author
