SAC nih PDF-Kalay battalion 4 sakhaan an chuh hna

The Chinland Post | 2022 May 16 – Sagaing ramṭhen, Kalay pengkomh, Kalay peng ah hrambunh a simi PDF-Kalay battalion 4 sakhaan cu May 14 ah SAC ralkap nih vanlawng 3, MI 35 helicopter 2, drone pawl le kekal ralkap 200 hrawng he an doh hna caah sakhaan an lak tiah theih a si.

SAC nih vanlawng in kahdohnak a tuah hmasa hnu ah Infantry 89 in Captain Ya Za Myo, Major Than Naing le Infantry Zwe Thu Htun hna hruaimi SAC ralkap 200 hrawng nih an rak doh hna caah hriam le kuan aa tlukruan lo tuk caah sakhaan cu chuahtak a si tiah PDF-Kalay rianngeitu nih DVB a chim.

Vanlawng kahdohnak ruangah PDF-Kalay in hliamhma a tuarmi an um ko nain a thimi an um lo tiah theih a si.

“SAC ralkap pawl kan sakhaan an phan i sakhaan le sakhaan chung thilrii pawl an hrawh dih” tiah PDF rianngeitu nih a chim.

SAC kahdohnak ruangah Sheshin, Laykya, Kokul le Shaṭaw khua 6 in mipi 5,000 leng cu ram tangah an zaam dih tiah theih a si.

“Kan zaamnak hmun pawl SAC nih van lawng in an kan kah. Vawlei lei zong in an kan doh. Kan zaam lengmang. Kan inn pawl cu an kan khanghpiak dih caah umnak hmun kan ngei lo, ram tangah buk kan i sakmi zong an kan khanghpiak chih” tiah a zaammi pakhat nih DVB ah a chim.

Ralzaam 5,000 leng cu eidin an har tuk caah bawmhnak an herh ko tiah theih a si.

Na ruahning rak langhter ve.. (Leave a comment)

%d bloggers like this: