SAC nih thla 6 chungah sualnak 2,800 hrawng a buar, SAC ruangah sunghmi 241 million man leng a si
The Chinland Post | 2022 June 11 – SAC nih ram pumpi in a luancia thla 6 chungah tlaihkhihnak, thahnawnnak telh in sualnak 2,800 hrawng a buar tiah NUG nih a thanh.
SAC nih hramhram in uknak a lak hnu a luancia 2021 February 1 thok in a tutiang ah ram pumpi in thahnawnnak le khuaning in khanghpiaknak hna a buar lengmang.
NUG thanhning ahcun, 2021 December 1 thok in 2022 May 31 tiangah peng le ramṭhen kip in SAC nih hrawhpiakmi mipi inn 12,719, sungmi tangka zapi 241 million leng man a si tiah a thanh.
Sual a buarnak a tambik hmunhma hi Sagaing ramṭhen a si i sualnak 1,178 a buar tiah a langhter.
Cun Magway, Mandalay le Yangon ramṭhen hna tiin sual a buarnak hi a tamtuk tiah a langhter.
Myanmar ram ah hramhram in uknak lak a si hnu kumkhat leng caan chungah ramkhel lei buainak, sipuazi, zatlang nunnak, ngandamnak le a dangdang a lamkip in a ṭumchuk dih i SAC ralkap le mipi hriamtlai phu hna, tlangcung hriamtlai phu hna karlak ah kahdohnak a fak.
SAC nih mipi cungah hramhram thiltuahnak, thahnak pawl khamkhawhnak ding caah tiin mipi hriamtlaih dothlennak tuah a si hi kumkhat leng a si cang i cu chungah SAC ralkap 14,890 an thi, hliam a tuarmi 4,814 an um tiah NUG nih a langhter.
A cunglei langhtermi cazin hi 2021 June 1 in 2022 May 17 tiang khawmhkhawhmi a si i a taktak dirhmun ah SAC ralkap a thimi le hliam a tuarmi an tam deuh kho men tiah a langhter.
About The Author
