SAC nih ti lam a phih ruangah Paletwa mipi hna harnak an tong

The Chinland Post | 2022 June 29 – Chin ramkulh, Paletwa ah Arakan Army (AA) le SAC ralkap karlak entainak a karh ṭhan i SAC nih Kaladan tiva chung umkalnak rii a khiah caah harnak ton a si tiah khuami hna nih RFA ah an chim.

Paletwa le Matupi pehtlaihnak lam cu fur caan ah umkal a har bantuk in hramhram in uknak lak a sihnu ah CDF he a cangmi kahdohnak ruangah cu lam cu hman khawh a si ti lo. Cucaah Kaladan tiva in kal khawh a simi Rakhine ram cu Paletwa peng ah hngatchan bik a si.

A luancia May 26, Paletwa peng ah AA le SAC ralkap karlak ah kahdohnak a chuak hnu in Kaladan tiva hmang in umkalnak cu SAC nih a phih tiah khuami hna nih an chim. Ti lam in kal kan duh a si ahcun, SAC le mipi nawl ngeitu sin ah zarhkhat tuan in nawl hal cia hnu lawngah kal khawh a si tiah an chim.

Paletwa in Rakhine ram Kyaukdaw khua hi a hlan ahcun zarhkhat ah voihnih tilawng a kal kho nain atu zarhhnih chung cu kal khawh a si rih lo tiah min langhter a duh lomi pakhat nih RFA ah a chim.

SAC nih nawl a awn lawngah ti lam hi kal khawh a si caah Paletwa khua ah chiti, Facang, cite man a kai tuk i harnak kan tong. A hlan ah facang tun khat ah 50,000/- a simi kha atu ahcun 80,000/- a phan cang tiah min langhter a duh lomi nih RFA ah a chim.

Facang man a kai bantuk in Fuel man zong 1 liter ah 4,000/- tiang a phan tiah a chim.

SAC nih ti lam an phih caah eidin a har, khuakhat le khuakhat i tlawn a har tuk cang caah ngandamnak le chiatni ṭhatni a um tikah a har ngaingai tiah Paletwa khuami pakhat nih RFA ah a chim.

Milu 60,000 hrawng an umnak Paletwa peng ah minung 700 leng cu Paletwa khuachung pumpululh certual ralzaam camp ah ralzaam dirhmun in an um tiah theih a si.

SAC nih ti lam a phih caah ralzaam pawl zong eidin harnak an tuar chih tiah theih a si.

Khuami hna caah vawlei tang phummi bom pawl zong ṭih a nun tuk caah harnak ton chin a si. Riikhiahmi hmunhma pawl le bom puah te pawl hna a um caah lo zong zalong tein kal ngam a si lo tiah Paletwa ralzaam pakhat nih RFA ah a chim.

Paletwa pumpululh certual ralzaam camp ah aa dormi nu pahnih cu eidin a har i mehhang an kawlnak ah bom an i lamh sual caah fak ngai in hma an pu tiah a chim.

Khuami hna nih an i hngatchan bikmi lam a phihmi hi SAC nih nuhrin covo a buar a si tiah Chin Human Rights Organization (CHRO) Director Za Uk Ling nih a chim.

A luancia May thla dongh lai hrawngah AA le SAC ralkap karlak kahdohnak a chuah hnu in atutiang kaphnih kar entainak a fak i a pawngkam khua ah kaphnih nih hmunhma an khuar tiah RFA nih a langhter.

 

Na ruahning rak langhter ve.. (Leave a comment)

%d bloggers like this: