SAC Nih Vanlei Kahdohnak le Hriamngan A Hman Chin Lengmang Caah Mipi Hna Nih Bomkhor I Cawh Cio Ding
The Chinland Post | 2023 July 4 — Chin ramkulh, Mindat peng ah SAC nih vanlei kahdohnak le hriamngan a hman chin lengmang caah mipi hna nih bomkhor i cawh cio ding in Mindat peng mipi uknak phu nih ralrinnak cathanh an chuah.
Atulio caan ah, hriamngan le vanlei kahdohnak ruang ah mipi a thi mi an um tuk lo nain biaknak lei inn telh in mipi inn cheukhat a rawk tiah an langhter.
Cubantuk kahdohnak ruang ah mipi an nunnak liam le hliam tuarnak hna a chuahter caah bomkhor a rannak in i cawh cio uh tiah an rak thanh cang ko nain a zul mi an tlawm tiah an langhter fawn.
Cun kan pawngkam ah SAC ralkap nih kah mi hriamngan a puak lo mi pawl kan hmuh ahcun tonghtham lo in khuabawi le CDF pawl sin ah thawngthanh colh ding tiah theihternak an tuah.
Hramhram in uknak lak a si hnu thawk in 2023 April thla tiang Chin ramkulh le Kalay pengkomh ah SAC nih vanlei kahdohnak voi 77 a tuah i Chin miphun 64 nak tlawm lo an thi tiah ICA nih a thanh. A thi mi chung ah mipi hriamtlai 10 an i tel i a tang mi 54 cu minung sawhsawh hna an si tiah a rak langhter.
