SAC ralhrang nih Sianginn 119 A Hrawh
The Chinlandpost| October 6, 2023 –
SAC ralkap nih hramhram in uknak a lak hnu thawk in Myanmar ram ah sianginn 119 a hrawh cang. Singhngakchia kum 19 tang hngakchia 491 a thah cang hna i, hngakchia 664 an tlaih cang hna tiah Assistance Association for Political Prisoners (AAPP) cazin nih a langhter. Mah hi War Crime (kahdohnak chung i buar mi sualnak) a buar si tiah NUG Human Rights Minister U Aung Myo Min nih October 4 Press Conference ah a chim.
Hramhram in uknak lak a si hnu ah SAC ralkap nih a phunphun in minung a thah hna i, vanlei kahdohnak, hriamngan in kahnak, ral bantuk in ruah i thah, cu bantuk thahnawnnak vialte hi War Crime a buar mi a si caah taza cuainak lam kawl a hau tiah a chim fawn.
2022, September 16 ni Thabayin pengchung sianginn pakhat cu SAC ralkap nih vanlawng hmang in kahdohnak faktuk a tuah caah, a tlawmbik ngakchia minung 11 nunnak an rak liam mi hi mibu tampi an thihnak a si. Cun SAC ralkap nih kahdohnak ruang ah sianginn 119 a rawk cang i September 27 ah SAC ralkap kah mi hriamngan nih Sagaing ramṭhen, Wantu peng, Kyodaungma khua sianginn in sayamah 1 le hngakchia 21 cu hriamngan ci nih a peh hna i an i hliam, SAC ralkap nih mipi cung ah vanlei kahdohnak le hriamngan kahdohnak voi 2,351 a tuah cang tiah theih a si.
NUG le a hawikom tlangcung hriamtlai phu pawl nih an tlaihnak hmunhma pawl ah raltuk lio ah buarmi sualnak (War Cime) pawl kha sual phawtnak, Warrant chuahnak, tlaihhrennak, tlaih hnu ah phungning tein sual internak hna kan tuah lai tiah a thanh. Hramhram in mi an thahnak kong he pehtlai in rian ngeitu pawl, mi thahnak he pehtlaihnak a ngei mi pawl vialte nih sualphawtnak an in ṭhan khawh nakhnga a rannak in kan tawlrel khawh nakhnga kan i zuam tiah theihternak a tuah.
