SAC Ralkap Hriamngan Ruang Ah Tanghra Siahngakchia Telh In 2 An Thi
The Chinland Post | 2023 August 4 — KNU nih a tlaihnak Kawthoolei hmunhma, Nyaunglebin pengkomh, Brigade 3 hmunhma ah SAC ralkap nih an kah mi hriamngan ruang ah tanghra siahngakchia 1 telh in sualnak ngei lo mipi 2 an thi tiah KNU nih a thanh.
A luancia August 2 zaanlei sml 3:30pm hrawng ah Brigade 3 hmunhma, Mu peng ah SAC Infantry 599 nih mipi umnak khuate lei ah 81MM lung 3 a kah i hriamngan lung 1 cu Mwedwin khuachung mipi inn pakhat cung a tlak caah innchung ah a um mi U Tin Oo (kum 71), Ma Zin Ma Win (kum 39), le Chit Phon Twe (kum 6) hna an i hliam i kum 37 a si mi Thida Aye cu a hmun ah a thi tiah theih a si.
Cun August 3 zinglei sml 8:30am hrawng zong ah Laydo peng ah a um mi SAC Infantry 274 nih Kyauktaga khua in Thamin-inkone khuate lei ah hriamngan an kah ruang ah kum 16 a si mi tanghra siahngakchia Paing Soe Thu a lu ah bom ci nih a peh i a thi tiah KNU cathanh chung ah hmuh khawh a si.
2023 kum thla 6 chung, Kawthoolei hmunhma ah kahdohnak voi 2,500 hrawng a chuak i kahdohnak chung ah SAC Battalion Commander 5, Second Battalion Commander 5 telh in SAC ralkap 2,600 leng an thi tiah theih a si.
