SAC Ralkap Nih Hriamnam le COVID-19 Pulrai in Mipi Tei Khawhnak Lam A Kawl

0

By Salai Bawi Lian Sang — Min Aung Hliang le a ralkap nih hriamnam le COVID-19 pulrai in ramchung mipi teinak lam an kawlnak cu tawite in langhter ka duh. COVID-19 pulrai ruang ah PDF training a kaimi khuachung an lut than tik ah mino hna cawlcangh ning hlatkhawhnak lam a ngei. PDF cheukhat an tlaih, an thah hna. Mipi lei nih ralkap dohduhnak kha COVID-19 pulrai hriamnam hman in khuachung ah zawtnak kharhter le mipi thihnak lam an kawl. Zawtnak ruang ah Mipi leikap lungthin zorter in mino hna le PDF pawl (Khua ah COVID-19 Volunteer) bu ser in PDF mino cawlcang kho lo le thazang thawngter lo ding in umter an duh.

Oxygen Chuahnak An Phih, An Kham

A tulio mipi a zawmi nih a herh bik mi thli (Oxygen) laknak a phih hramhram. Zaan can chuahnak nawl an khar (Curfew) order ruangah zaan mizaw zual mi hna Sii cawk le Oxygen lak khawh a si lo. Cu ruang ah a thi mi an tam. Mikip nih nunnak caah a herh bikmi thli (oxygen) hmuhnak lam lawng kawl a si tik ah khuazei ah BOMH, Meithal a puak ti le PDF le ralkap dohnak ah ralkap lei minung zeizah an thi ti le khuazei ah Dalan an thah timi thawngpang theih ter lo kha ralkap nih an duh mi a si. Ram chung mipi cungah dawtnak an ngeih lomi ruang ah COVID-19 pulrai cu hriamnam phun khat ah an hman. Mipi thahnak ah an hman.

July 16 tiang Ramkomh Kawlram ah COVID-19 hrik ngeimi 230,000 le a thimi 8000 hlei an si. ASEAN ram ah zawtnak hrik a karh rang bik mi le minung a thi tam mi pathumnak dirhmun ah a phan. Mah tluk mipi an thi cuahmah lio ah Yangon ah oxygen sehzung 16 an khar. North Ohkalah Medical Sianginn 2 le Siizung ah ralkap bawi pawl nih tuahmi lawng ah oxygen lak khawh a si. Cun mah le peng chung um mipi tangka in an cawkmi oxygen seh an phihter hna. Kalaymyo mipi nih ting 1500 kyat in cawkmi nikhat ah Oxygen 40 ml dur 70 a chuah khawhmi Seh zong an phih ruangah thih can za lo in a thi mi an um.

Ralkap timhmi cu oxygen a herh mi nih an mah ralkap nawlngeihnak tang ah um hna sehlaw ralkap lawng nih mipi nunnak a chanhchuah khawh tiah kan mah lei ah mipi i lungthin i mer than hna seh ti an duhnak a si.

Cozah Sii-Inn Kip Ah Ralkap An Um

2015 kum NLD chan COVID-19 Center (emergency center) pawl zong an hrawh dih. Mipi sin COVID-19 pulrai a tlun lai i zawtnak a karh lai le mipi a thimi an tam tuk lai kha zei an rel lo hlei ah Quarantine Center a sakmi  zoh tikah a zawmi chim lo a dammi hmanh um awk tha lo. Cun, Sii-inn ah Ralkap an um ruang ah mipi duh can paoh ah lutchuah khawh a si lo. CDM a lutmi Siibawi (Doctor le Nurse) nih siizung a kai lo caah Sii-zung panh khawh a si ti lo. Sii-inn ah Sii, Mizaw, Doctor le Nurse um ding kha Ralkap nih meithal kuan le zen in Sii inn an hngah. July 19 Yangon ah CDM lut Sibawi nih volunteer in COVID-19 a zaw mi pawl an zoh mi ah an tlaih hna hlei ah Siikhan (Clinic) um sii vialte an chuh dih. Cun, a cheukhat peng ah PDF mino an tamnak le raldohnak a tamnak peng ah cun Siidawr vialte an kharter dih hna. Lamzawhnak le CDM a lutmi tam deuh nih ralkap umnak Sii-inn cu panh ngam a si lo caah mah le inn tein celh lo bu tein thlop cio a si. Cheukhat an nunnak a liam.

COVID-19 Hrik Hmunkip Ah Karhter An Timh

Pohmah (505-A) le Ralkap dohtu hna thongtlaknak hmun kip ah COVID-19 hrik a karh ngai. COVID-19 Test an tuahter hna lo. Thongtlami an hrem/thah tik ah a thimi paoh  COVID-19 hrik in an thi tiah thawngzamh an duh. COVID-19 pulrai hi Ralkap nih hriamnam tha pakhat ah an hman lio can a si. Mipi hruaitu tampi a tlaih hna.

Kalaymyo peng ah June thla chung a thimi minung 500 hlei le atu July thla ni 1-16 tiang ah minung 406 an thi cang. Kawlram chung pumpi nih a voithumnak COVID-19 thlihrang in mi zeizatdah thihnak tuar a si rih lai. Ramchung mipi cu COVID-19 rai le ralkap pulrai ven in um a si tikah vawlei chung ram vialte lak ah ram tha lo bik ah kan um lio can a si ko. Hitler hmanh nih a ram mi German pawl a thah hna lo.

Mipi Thahnak Ah Hriamnam Cawknak An Ngei COVID-19 Rai Dohnak Caah Tangka An Ngei Lo

NLD cozah chan lio COVID-19 pulrai Sii cawknak caah Dollar million tampi le Kawlram chung tangka pechan mi vialte a tu a tlau dih. NLD nih February thla 2021 in pulrai sii chunh ding a timi zong Ralkap ruang ah nihin tiang sii chunh a si ti lo. Ramdang nih COVID-19 Sii tampi an rak pek  na tein khuazei a phan ti theih a si ti lo. Ralkap nih COVID-19 rai dohnak caaah Ralkap bawi chungkhar hna cu Sagaing tlang ah humhimnak (security) he an um ter hna. COVID-19 pulrai in mipi dohnak a hmante lai ti cu elawk um lo in theih a si. Kawlram chung mipi nih kan herhbik mi Ralkap Dohthlennak kha COVID-19 rai dohnak lei ah an mer mi hi ralkap nih teinak hriamnam an kan hman hnawh. Kawl ralkap nih an pathian bantuk an i bochan mi Tuluk (China) nih COVID-19 rai tuah serning in an ram mipi cung dawtnak le zangfahnak ngei lo in an ram minung 4000 hlei COVID-19 test nak in a rak thah hna. Vawlei cung minung million tampi an thi cang.

Min Aung Hliang le a ralkap hna nawlngeihnak duh tuk ruang ah Kawlram ningpi in mipi sin ah COVID-19 pulrai hriamnam a hman ti cu el awk um a um lo. Ramchung PDF an hun daih ahcun ramkip (International) chimrelnak (pressure)a zor deuh lai tiah an ruat natein tu lio COVID-19 rai hi kham khawh ti lo dirhmun a phan caah UN zong nih Kawlram mipi chanhchuah theih lo dirhmun a um ti kha a theih cang. Ralkap nih Oxygen phit khenhmi le COVID-19 rai thlopnak ah buai lo in mipi thihpheih le thinphanter in raldohnak lei ah a buai mi hi mipi vialte cihmihnak(Genocide) a si cang ti kha UN nih a ruat cang i Kawl ralkap nawlngaihnak cu adonhnak lam a pamh thluahmah ko cang.

Biadonghnak

Kawlram cu Ne Win, Saw Maung, Than Shwe, Khin Ngunt, Thein Sein le Min Aung Hliang Ralkap cu a hrintu/cawntu nu le pa a thatmi le ulenau zong a thatmi an si. Cu caah atutan mipi nih kan dohmi ral hi kan tei hrimhrim a herh. Atutan kan tei hna ah cun kan techin farpar in kan Chin Miphun kan luat lai. Kanmah tein nuhrin covo kan tingco lai, kan holh le ca in sianginn kainak lam le Democracy Federal in zalong mi uknak lam a on cang lai. Kawl sal in kan luatnak zong a si lai. Kan biak Pathian zong zalong tein kan piak kho lai.

Min Aung Hliang a uknak a hmun zungzalnak ding lam pakhat lawng an ruat. PDF training a dih mi mino hna cheukhat pulrai in an zaw an thi lai. Asilole, an nu le pa, u le nau an thi an zaw lai i anmah pawl thlokbulnak ah mino an i manh lai lo. Khuachung ah duhlonak lamzawh le raldohnak a um ti lai lo. Mino thinlung a zor lai. Mipi nih an kan tih lai i kanmah nih kan uk peng khawh hna lai tihi MAH le a ralkap bawi pawl an i timh mi a si.

NLD chan lio ah Cozah le Mipi komh in COVID-19 pulrai rak doh a si. Ralkap chan ah Ralkap nih COVID-19 komh in mipi an kan doh.An kan thah. Mipi lei kap in COVID-19 ral runvennak ah ralring tein um hna u sih law pulrai teinak le Ralkap teinak cu Bawipa nih an kan pek hrimhrim ko lai.#

About The Author

Na ruahning rak langhter ve.. (Leave a comment)

%d bloggers like this: