SAC ralkap nih thah ruangah mipi 1,740 leng an nunnak a liam

The Chinland Post | 2022 April 12 – Myanmar ram ah kumkhat leng SAC ralkap nih hramhram in thah ruangah sualnak ngei lo mipi 1,741 an nunnak a liam i tlaihkhih a tongmi 13,201 an phan cang tiah Assistance Association for Political Prisoners (AAPP) nih a thanh.

A tu cazin hi 2021 February 1 in 2022 April 11 tiang AAPP nih a khawmhsuatmi a si i a taktak ah a nunnak a liammi an tam deuh kho men.

Pau dothlennak chungah April 12 tiang hren a tongmi minung 10,161 an si i 990 hi thongtla dingin nawl chuah an si cang.

Kum 18 tang hngakchia 2 telh in minung 59 cu thihnak (Death Penalty) an pek cang hna.

Tlaihkhihnak nawl (Warrant) chuah ruangah a zaammi 1,976 chung in thihnak (Death Penalty) pekmi 41 telh in 120 hi mitcawtnak (Blind Punishment) pek an si. Thihnak (Death Penalty) pekmi an zapi te 100 an si cang tiah theih a si.

A luancia April 8 ah Sagaing ramṭhen, Ayadaw peng, Shoutkha khua cu SAC ralkap nih an luhhnawh hna. Khua mei in an khangh, hriamngan in an kah ruangah khuami U Shwe Tin a nunnak a liam tiah theih a si.

April 8 ṭhiamṭhiam ah, Magway ramṭhen, Pakokku peng, Myitphya khua cu SAC ralkap nih mei in an khangh lengah Ko Kyaw Sua Oo (kum-26) telh in mipi 4 thilak in an kah hna tiah theih a si.

Na ruahning rak langhter ve.. (Leave a comment)

%d bloggers like this: