Sagaing Ramthen Cozah Bawmhnak Ks. Sing 95 In Kalay Ah Chin Miphun Ni An Tuah Lai
Kalay CND/Photo: TCP
TCP-Kalay| 2019 January 31| Sagaing ramthen cozah bawmhnak ks. sing 95 in Kalay ah akum 71 tlinnak Chin Miphun Ni cu sunglawi ngai in tuah an timh.
Sagaing ramthen cozah nih Chin Miphun Ni tuahnak caah ks. sing 100 bawmhnak a pek. Cu bawmhnak pekmi cu; Kalay- Chin Miphun Ni tuahnak caah ks. sing 95, Monywa- Chin Miphun Ni tuahnak caah ks. sing 3 (300,000) le Kata – Chin Miphun Ni tuahnak caah ks. sing 2 (200,000) tiin thenphawt an si lai tiah tuanvo ngeitu upa sin in The Chinland Post nih kan thieh.
Kalay ah tuahdingmi Chin Miphun Ni cu, Sagaing ramthen in Chin Miphun aiawhtu Chin Affair Minister Pu Lal Thawm Thang le Kalay Chin miphun upa hna hruainak in No.2 Basic Education High School cer tual, Taungphila sang ah February 19-20 tiang nihnih chung sunglawi ngai in an tuah lai.
Chin Miphun Ni tuahnak ding tawlreltu committee chungtel Pu Sui Khar nih, “Tukum Kalay ah tuahdingmi Chin Miphun Ni (CND_Chin National Day) cu February 19 zan in kan thawk lai. February 20, zing 9:00am in CND biachimnak le laksawng peknak in caan hman a si lai. Cun, hi ni ah muidawh zuamnak, Chin Miphun chung in laam a phunphun (Hakha nih Lai laam phun 3, Falam nih laam phun 3, Tedim nih laam phun 3, Hualngo nih laam phun 2 le Mizo nih laam phun 2 cio) hmuhsaknak an ngeih lai. Tanghra 6D (Distinction) a awngmi le secular lei in Doctor (Dr.) a hmumi hna conglawmh upatnak laksawng peknak zong a um lai. CND cabia tialzuamnak le mah le miphun hoih in nunphung thilthuam hmuhsak langhternak zong a um lai. Hlasaknak (stage show), Talent show, pumrua dawh zuamnak, pahrang a ngeimi hna nih anmah le an thiam ciomi a phunphun zuamnak le hmuhsaknak a um lai” tiah The Chinland Post ah a chim.
“Kalay, CND a tlamtling khawhnak ding ah sub committee 8 kan ser. Kalay-Kabaw chung a ummi khaute kip cio zong ah thawngthanh a si lai. Khuallian sawmmi ah Ramkomh Tlangcung Miphun Kongkau Minister U Nai Thet Lwin le pengkulh bawi upa vialte sawm dih an si” tiah a biapeh ah a chimchih.
Kalay peng milu 338,079 ah Kawl miphun 180,464, Chin miphun buaktlak in (Falam, Tedim, Mizo, Hakha) fonh 155,669 le miphun dang 1946 an um. Mah Chin miphun chungin Chin (Hakha) holh aa hrawmmi, dihlak milu 21,019 hrawng hi Khuate khua 20, le Kalay Khuapi chung sang (6) ah inn 1504, le milu in 4443, le Khrihfabu (51) hrawng an um tiah kan theih.
About The Author
