Sagaing le Myinmu ramri ah minung 15 an thah hna
The Chinland Post | 2023 March 3 — Sagaing ramṭhen, Sagaing peng le Myinmu peng ramri ah minung 15 thah an tong i adang 1 zong a tlau tiah khuami hna nih RFA ah an chim.
March 1 zinglei ah Sagaing peng, Tatai khuate ah SAC ralkap 100 deng Myinmu lei in an rak lut i mipi sawhsawh 15 an tlaih hna tiah theih a si. Cu hnu March 2 zinglei ah Myinmu peng Nyaungyin khua pawng ah ruak 14 an hmuh hi a si.
Thah a tong mi minung 14 hi kum 30-50 kar an si hna i adang pakhat hi a thi ma a nung ti zong theih a si lo tiah khuami hna nih an chim.
Cubantuk in Myinmu peng Nyaungyin khuami pa pakhat cycle aa cit lio ah SAC ralkap he an i tong i an kah i a hmun ah a thi tiah theih a si.
March 1 ah SAC ralkap pawl Tatai khua chung an luh lio ah PDF hruaitu Kyaw Zaw an tlaih i a pum an tan tiah khuami hna nih RFA ah an chim.
SAC leiṭang Telegram Channel ahcun Sagaing peng chung ah hmunhma zohfelnak a tuah mi SAC ralkap le PDF phu hna karlak March 1 ah Tatai khua ah kahdohnak a chuak i March 2 zong ah Myinmu peng, Nyaungyin khua ah kahdohnak a chuak i PDF chungtel 15 an tlaih hna tiah an ṭial.
Sihmanhsehlaw khuami hna nih cun tlaih a tong mi hna hi mipi sawhsawh an si tiah RFA ah an chim.
About The Author
