Sagaing, Magway, Kayah le Chin ah mipi inn tambik khangh piak a si
The Chinland Post | 2022 March 11 – Ramkomh Kawlram ah 2021 February thok in 2022 March thla zarhkhatnak tiang ah Kawlram pumpi in mipi inn 6,719 leng SAC ralkap nih an kanghpiak tiah Data for Myanmar nih a thanh.
A tu bantuk in inn le lo hrawhpiak a simi chungin SAC ralkap le mipi hriamtlai phu pawl kahdohnak a fak bik hmunhma hna a simi Sagaing, Magway, Kayah le Chin ram hna hi a tambik an si.
A tu March thla zarhkhatnak ah Sagaing ramṭhen chungin mipi inn 270 leng le Magway ramṭhen chungin mipi inn 250 hrawng cu SAC ralkap nih an khangh dih i zarhkhat chungah ram pumpi in mipi inn 600 hrawng khanghpiak a si tiah Data For Myanmar cathanh ah an langhter.
Cu lawng si loin, Sagaing ramṭhen chung i khua hna cu internet line hrawhpiak an si i March thla zarhkhatnak chungah internet line hrawhpiak a si dihnak khua a karh chin tiah khuami nih an chim.
Sagaing ramṭhen, Shwebo peng chung le KhinOo peng chung i khua hna cu a luancia March 3 thokin internet line a rawk dih. Hmandaw, Dankone, Kyunlay, Theindaw le Mutha khua hna i mipi in 70 leng cu khanghpiak a si tiah an chim.
Mipi inn khanghpiak an ton lawng si loin khuami 3 le mipi hriamtlai 14 an nunnak a liam tiah mipi hriamtlai phu nih BBC ah an chim.
About The Author
