Sakta Khua Ah A voi 16nk Senthang Mino Tonpumhnak An Tuah Lai
The Chinland Post | 2019 April 17 – Kum khat ah voikhat ‘Senthang Mino le Sianghleirun Siangngakchia Bu’ hruainak in tuah tawnmi tonpumhnak le lentecelh zuamnak a voi 16 nak cu Sakta khua ah an tuah lai tiah kan theih.
Salai Lian Thawng Hnin nih “atu kum hi a voi 16 nak a si. Kum khat ah voikhat nawn peng in kan tuah. Tutan hi, 2019 April 23 in 30 tiang a si lai. Hakha in meng (khan) 21 lawng a hlatnak Sakta khua ah kan tuah lai. Cun, atu kum hi khua 25 nak in tlawm lo cu an ra lai i a phan kho lai tiah ruahchannak zong kan ngei” tiah Chinland Post ah a chim.
Atu kum a hlei khun in, Khualian ‘guest of honor’ ah Chin Community of Indiana (CCI) ah Assistant General Secretary a tuan liomi, Salai Stephen Sang Cem, USA a ummi an sawm tiah kan theih.
“Stephen Sang Cem hi, Senthang Mino a kan dirpi taktakmi, USA ummi a si. Cun, tutan ahhin Senthang peng thimfung thlaknak (constituency) chung in 2020 thimnak ah luh aa timmi zong biachimnak le biahalnak ngeih a si lai. Senthang peng chung in mino nih kum khat voikhat kan i orhmi tonpumnak puai nganpi a si” tiah hruaitu pakhat nih a chim.
“Tutan ah a bik in mino tonpumh le lentecelhnak hmun ah, pumpululh (bawlung), volleyball (Nu/Pa), Surlonh (Chinlung), Tlikzuam (Marathon), Paih, tbk. hi lentecelhnak ah kan tuahmi an si. Cun, Senthang mino le sianghleikai chung in, zohchuntlak ‘Mister & Miss Senthang’ thimnak zong kan tuah. Lentecelh zuamnak lawng hi hmaithlak silo in, Ca, Computer, Solo hlasak zuamnak le Pahrang hmuhsaknak (Talent Show) tbk. zong kan tuah” tiah Salai Lian Thawng Hnih nih cun chim chap.
Hi kong he pehtlai in, Senthang Mino le Sianghleirun Siangnakchia Bu hruainak ah caan saupi hruaitu a rak tuanmi Salai Sang Hnin Lian kan pehtlaih tik ah hitin a chim.
“Kan ule deuh nih an rak thawkmi a si. Keimah, Kalay University ka kai a kum khatnak ah a voi 3nak Loklung ah kan rak tuah. Ka rak i tel colh ve. Keimah ka theih tawk in kan ule nih an rak tuah hnawh chan hi a lentecelhnak le mino hawikomhnak sawhsawh lawng silo in, timhmi nganpi an rak ngei. Cucu zeidah a si tiah cun, Senthang peng in ngakchia le mino tanghra awng in sianghleirun a kaimi tam deuh hna seh, karh usih timi saduhthahnak nganpi he a rak si.”
2000-2005 tiang ahhin, Chin miphun in Kalay, Monywa, Mandalay le Yangon tbk. ah sianghleirun kaimi hi an rak karh cingling a si. Kum dang nak in an rak karh deuh caan a si tiah theih a si.
“Hi lio caan ahhin, Senthang peng in tanghra awng in sianghleirun a rak kaimi an rak tlawm ruang ah, khuate kip ah an tlawng, khua khat hnu khua khat fimcawnnak a biapitnak chimrelnak a ngeih dih hnu ah, atu bantuk kum khat voikhat tonpumnak hi a chuahnak a si. Khua lei ummi, ngakchia le mino kar ah, sianghleirun kaimi pei hruaitu a si ko cang ko hi timi in fimcawnnak a biapit zia an theih khawhnak hnga ding ca bik a si” tiah Salai Sang Hnin Lian nih a chim chap.
Kum dang he lo deuh lo in, “a donghnak zaan ah concert um lai. Hlasak thiam Thawng Bawi nih ngeihmi, ‘TnC Band’ zong kan hlan cang. Hlasatu ah Thawng Bawi, Biak Tha Cuai, Mercy, Biak Cin Thang le a dangdang tampi kan sawm hna. Cun, kum dang ahcun, Senthang peng chung in Pastor te caan kan pek hna, a silo ah, thawngtha chim minthang pakhat kan sawm tawn, nain tukum cu Stephen Sang Cem a si lai” tiah Salai Lian Thawng Hnin nih a chim.”
Hi tonpumhnak le lentecelhnak caah a tlangpi in Kyat Sing 56 dih in timhlamhmi a si.
Senthang peng chung Mino, Sianghleirunn Siangakchia, Khuabawi, Pastor, Sianginn cachimtu, tbk. tiah minung thong khat leng kum khat ah voikhat an i tongpum kho tawn tiah theih a si. Senthang peng ahhin, cozah uknak leikap in khua hme tete telh in, khua 32 tluk a um. Cuchung ah, khua 15 tluk hi an i tel kho tawn tiah kan theih.+++
About The Author
