Salai Beva Le U Chia Haw Rak Hlam Hna U Tiah AA Nih Khuami Sin Ah Thawng An Thanh

TCP-Thantlang| 2019 February 27| AA ralkap nih tlaih in an kalpimi hna Paletwa peng Tantaung khua palek bawi Salai Beva le an khuabawi U Chia Haw cu AA ralkap nih rak hlam uh tiin khuami sin ah thawngthanhnak an tuah tiah khuami upa pakhat nih a chim.

“An kalpimi hna cu va lak dingin khuanu/pa le Pastor tiin khua khat pahnih cio an ti hna i Pastor pahnih cu an kal cang nain a tutiang zei thawngpang hmanh kan thei rih lo” tiah Tantaung khua upa pakhat nih a chim.

February 22 ni ah AA hriamtlai phu nih Tantaung khua palek bawi Salai Beva le khuabawi U Chia Haw cu an rak kalpi hna i ni 5 a rauh hnu ah a tubantuk in AA ralkap lei nih khuami cu rak la hna u tiah thawngthanhnak an tuah hna hi a si.

“Palek bawi (sakhan hmu)le an khuabwi kongkau cu ceih dingin minung 20 an auh hna tiah kan theih.

Micheu cu a kal duh lo mi zong an um. A ruang cu Kawl ralkap zong cuka pawng hrawng ah an um lio a si ca le AA ralkap he an i kah than lai phan ah an kal ngam lo nak zong a si lai. Cubantuk in Pastor le khuanu/pa hna he an i pehtlaih tikah hin va kal in an mah cu va chawnh an hau, cu lo ah cun an tlaihmi hna palek bawi le khuabawi cu fawi ah an thlah sual hna lai lo tiin bia kan beuh hna” tiah Chin ramkulh chimnak nawl ngeimi U Soe Thet nih a chim.

Ref: Khonumthung

Na ruahning rak langhter ve.. (Leave a comment)

%d bloggers like this: