Salai Cung Dawt Timi Pa Nih Paletwa Ralzam Caah Tiin Khualhringtlang Khua Cheukhat A Hlen Hna

TCP-Thantlang|15 May 2020| Paletwa ralzam bawmhnak caah tiin Salai Cung Dawt timi pa nih Khualhring tlang Mualkai le Tlangkhua khuabawi hna cu tangka kholh ter in a hlen hna tiah theih a si.

“May 8 ni ah khan mah mipa nih phone in a ka chawnh. Paletwa ralzam caah zarhpi ni ah (May 10) tangka rak kan kholh piak u law ni hnih ni (May 12) ah Thantlang  sianginn sang i sianginn pawng inn tang kan zungah rak kan chan kho u law kan duh ko tiah a ka chawnh. Khua mi cu tangka ka kholh ve hna. Micheu nih Kawm le Facang in an i kam. Tangka fang in 130,000 hrawg a chuak. Kuat ding ka ti tikah, kan tlang chung khuabawi ka hawi le ka chawnh cio hna tik ah kan nih cu an kan ti lo tisi, Tlangkhua le kan mah Mualkai lawng an kan ti tikah, ticun Cung Dawt cu kan mah khua hnih lawng nan kan kholh ning a si tiah ka hal tikah, ka dang khua zong a changchang in kan kholh ko hna lai a ka ti. Cutik ah Tlang mino President ka chawnh tikah cu bantuk cu Thantlang ah an um ka thei bal lo, rak kua rih hla a ka ti caah a tu ni tiang ka kua thai lo, mah mipa cu pehtlaih than khawh a si ti lo. A chim ning hna ah cun Roca zong tha tein kan in pek hna lai an kan ti. Tangka zong khrih an hau te ko lai.”tiah Mualkai khuabawi Pu Benjamin nih TCP ah a chim.

“Hakha le Thantlang ah Paletwa ralzam hna caah phu kan ser i bawmh hal mi kan si, ni hnih ni hrawngah thawng vun kan thanh than uh an kan ti, aw a si maw nan mah hna ra u law a chuak deuh lai cu ka ti hna, kan mah cu COVID-19 ruangah a ra ngam ding kan si lo an kan ti. Khua pawngkam ka chawnh ve hna tikah kan nih cu an kan ti lo an ka ti, thlisining ka hlat rih lai ka ti i kei zong tangka cu ka khol thai lo.”tiah Tlangkhua khuabawi nih TCP ah a chim.   

Mualkai khua (photo: Scofield Van)

“Tangka a tlamtling cang zeitin dah kan in chanh ning hna a si lai tiah Phone cu kan chawnh. Nan riantuan ning zong theih kan duh, Viber in nan riantuannak le riantuan tu OC nan hmanthlak hna na ka kua kho hnga maw ka ti tlawmpal ah phone a chiah colh. May 12 tiang zong Viber online i mah pin ah Online lo in phone chawnh khawh zong  a si ti lo. Mualkai khuabawi sin ah Phone number hi zung i he pahnih a pek hna. An kan hruai tu Dr Tlaung Thang hi zanlei suimilam 5 hnu lawngah zungah a thu tawn, Cu tikah zanlei 5:00 hnu ah phone cu ka chawnh i a tlai bal lo, chun ah ka chawnh than tikah Hakha  Arrawaddy Bank nih an tlaih. Thilsing ka chimh hna tikah hlannak a si ko lai an ka ti. Kei mah ka ruahnak ah Cung Dawt le Dr. Tluang Thang hi aa khat mi a si lai hrokhrol in rian a tuan mi a si lai. Thantlang sianginn sang um mi ka si a ti, nain ka zum lo Kawl lei um mi phun a si lai ka zumh. Ho cio paoh i ralring ko hna u sih.”tiah Khuahring thang mino President nih TCP ah a chim.

Hi kong he pehtlai in Paletwa ralzam bawmhnak kongah aa teltum ngai mi le hruaitu zong a si mi Salai Tluang Te nih cun “hi bantuk in Thantlang peng ah Committee kan dirh bal lo, a tu hi CBC hruainak in Hakha le Thantlang ah Committee dirh ding timhtuahnak ngeih lawng a si rih.”tiah TCP ah a  chim.

Ma mipa Cung Dawt timi cu a phone no 09429381861 a si i The Chinland Post nih thil sining theih duh ah  kan pehtlaih ve i a phone cu Power off.

Na ruahning rak langhter ve.. (Leave a comment)

%d bloggers like this: