July 24, 2024

Salai Htet Ni Nih Matupi Ah Hnukir Lo In Kahdohnak Kan Tuah Rih Ko Tiah A Chim

0

The Chinland Post | 2024 June 28 — Chin ramkulh thlanglei, Matupi khua kahdohnak cu Chinland Council, Chinland cozah kuttang hriamtlai phu pawl nih pehzulh in an tuah rih i Matupi khuachung ah a cang mi kahdohnak hi Chinland Council kuttang hriamtlai phu le ULA/AA karlak ah a cang mi kahdohnak a si cang tiah CNF/A chimphuannak nawl a ngeitu Salai Htet Ni nih Khonumthung Burmese ah a chim.

Chin Brotherhood phu nih June 24 zaanlei thawk in Chinland Council ralkap pawl cu Matupi khuachung in kan ṭhawl khawh cang hna tiah an thanh ko nain Chinland Council kuttang hriamtlai phu pawl nih hnukir lo in kahdohnak an tuah cuahmah rih ko tiah CNF/A chimphuannak nawl a ngeitu Salai Htet Ni nih Khonumthung Burmese ah a chim.

“Matupi in hnu kan kir lo, kahdohnak kan tuah cuahmah rih ko” tiah a chim.

Matupi khuachung ah Chinland Council kuttang hriamtlai phu pawl le Chin Brotherhood phu hna karlak ah June 18 in aa thawk mi kahdohnak hi atu ahcun Chinland Council le ULA/AA karlak kahdohnak ah aa chuah cang tiah Salai Htet Ni nih a chim.

“Chin miphun hna Nationalism ah kan i funtom khawh lo mi kan dernak kha caan ṭha la in, AA nih kanmah Chin miphun chung hriamtlai phu hna hmang in amah miaknak caah Chin ramkulh chung ah a rak lut. Cubantuk in an kan tuah hi kan i fahsak khun” tiah Salai Htet Ni nih cun a chim.

Matupi khuachung kahdohnak ah Chin Brotherhood phu cu ULA/AA caah riahcaw chantu ding rian an ṭuan hna tiah a chim fawn.

Matupi khuachung kahdohnak ah ULA/AA nih ralkap thazang tampi hmang in kahdohnak a tuah i minung ruun byuha (လူလှိုင်းဗျူဟာ) a hman tiah a chim.

Cubantuk in Matupi khua lak kahdohnak hi Chin Brotherhood Operation a si i AA cu a bawmtu lawng a si tiah CDF-Matupi Brigade 1 chimphuannak nawl a ngeitu Boi Uk nih a chim ve.

Chin Brotherhood phu le Chinland Council hriamtlai phu karlak kahdohnak hi June 18, 19 le 20 bantuk in a fak tuk ti lo i a dai deuh ngai cang tiah Boi Uk nih a chim.

Kaphnih karlak ah biaruahnak a um rih lo bantuk in biaruah ding in i sawmnak zong a um rih lo tiah theih a si.

Chinland Council, Chinland cozah kuttang hriamtlai phu pawl nih kahdohnak an ngol ahcun kahdohnak hi a dai colh ko lai tiah CDF-Matupi Brigade 1 lei chimphuannak nawl a ngeitu nih a chim.

Matupi khua ah SAC ralkap an thian nakhnga LIB 140 le Byuha-kone (Tactical Base) hna cu Chin Brotherhood Operation min in kahdohnak fakpi an tuah lio a si i byuha-kone (Tactical Base) pawng Golf tual sakhaan cheukhat telh in sakhaan hme cheukhat kan lak khawh cang tiah Chin Brotherhood phu nih June 25 ah thawng an rak thanh.

Matupi khua lak kahdohnak ah CNA hruai mi hriamtlai phu pawl cu June 24 zaanlei ah kan ṭhawl khawh cang hna tiah Chin Brotherhood phu nih an rak thanh.

Sihmanhsehlaw June 25 ah a cang mi kahdohnak ah CDF-Matupi Brigade 2 chungtel Salai Peter Sang a nunnak a liam i atutiang kaphnih karlak kahdohnak ah Chin hriamtlai 6 hrawng an nunnak a liam cang tiah theih a si.

Matupi khua lak kahdohnak cu Chin Brotherhood Operation min in CDF-Matupi Brigade 1 telh in Chin Brotherhood phu, Magway hrambunh Yaw Army le AA hna nih June 9 in kahdohnak an thawk.

ULA/AA nih a tlaihnak Paletwa peng lei in AA ralkap 180 hrawng cu June 23 ah Matupi khua ah an rak lut tiah CDF-Matupi Brigade 2 nih June 24 ah thawng an thanh.

Matupi peng biaknak lei le mipi lei phu nih Matupi peng ah a cang mi Chin miphun karlak kahdohnak cu cabuai cung ah daihnak in tawlrel u tiah forhfialnak zong an thanh.

Matupi khua lak kahdohnak caah Matupi khuachung um upa le hngakchia telh in Chin mipi tampi cu India telh in ramchung hmun tampi ah kahdohnak a chuah hlan in an zaam cang hna tiah Khonumthung Burmese sin in thawng theih a si.

About The Author

Na ruahning rak langhter ve.. (Leave a comment)