Salai Isaac Khen Le Chin Upa Hna Nih Malaysia Chin Ralzaam An Va Ton Hna Lai

0

City Hunter| 2018 August 2| Chin ramkulh Sipin le Electric vuanci hlun a simi Salai Isaac Khen le Chin upa hna nih Malaysia ah Chin ralzaam ton biaruahnak an ngeih hna lai. August 11 khi Kawlram in an i thawh lai tiah kan theih.

Hi kong he pehtlai in The Chinland Post nih Salai Isaac Khen cu kan pehtlaih in atu bantuk in a kan leh.

“August 11 khi Yangon in kan i thawh lai. Keimah lawng si lo in Chin miphun tengnge in bochanmi upa panga hrawng he kan si lai. Ahoho dah an si lai cu chim awk a tha rih lo. Malaysia ah ni 10 hrawng kan caam lai i Chin ralzaam pawl ton biaruahnak kan ngeih hna lai. UNHCR nih Chin ralzaam phih a si cang lai tiah thawng a thanh ruang ah hi kong ah zeitindah Chin ralzaam pawl kan bawmhchanh khawh hna ning a si lai timi an ruahnak le an duhnak kan va hal hna lai. UNHCR nih cathanh an chuahmi cung ah anmah aw-aan kan va ngaihpiak hna lai. Kawlram ah kir an duh le duh lo, zeidah kan i bawmhchanh khawh lai tibantuk biaruahnak kan ngei lai i an aw-aan le an duhning vialte kha Chinram cozah sin ah ka chuahpi than dih te lai.”

“Kawlram in Chin Miphun lawng nan ram ah kir cang u, nan ram a dai cang a kan timi hi cu a poi ngai. Mon ramkulh le Yakhine ramkulh zong khi kanmah Chin ramkulh bantuk an si ve ko. Paletwa ah i kahnak a chuak lengmang rih ko. Cucaah, Malaysia Chin ralzaam nih an duhnak le an aw-aan vialte hi Chin ramkulh cozah sin ah kan chuahpi lai i Chin ramkulh cozah nih ramkomh cozah sin ah a chuahpi le ramkomh cozah in tlangtlak hmasa a herh lai. Cu hnu ah ramkomh cozah, Chin ramkulh cozah, UNHCR zung le Malaysia Chin ralzaam tlangtlatu committee hna he zapi i bawmh in riantuanti a hau te ding khi a si”.

Malaysia um Chin ralzaam hna he ton biaruahnak an ngeih tikah zeibantuk lungput le ruahnak he dah an chawnhbiak hna lai? Zeitindah thazaang an va pek hna lai? Ralzaam sin ah zeibantuk ruahnak pek le cheuh dah an duh tibantuk ruahnak halnak caah a ralaimi August 4, suimilam 1:00-5:00pm tiang Orchid Hotel, Yangon ah Chin miphun tengnge, ramkhel party, Chin zatlang phu tibantuk pawl sawm in ton biaruahnak an ngei hmasa lai tiah kan theih.

“Tutan Malaysia ka tlawn dingmi hi Chin ralzaam ton ruah bak lawng ah a si, zei kong kemhchih in kal kaa timhmi a si lo. UNHCR nih Chin miphun caah ralzaam phih a si cang lai tiin thawng a thanh zarh hnih hnu ah Chin ramkulh cozah he tonbiaruahnak kan ngei. Chin ralzaam hna hi international phungphai he aa tlak ning in kan tawlrel hna lai tiah kan ceih. Tutan ka khuallam hi Chinram cozah min in a si lai lo. Nain, kan hmuhtonmi vialte cu Chinram cozah sin ah ka chuahpi dih te lai. Malaysia Chin ralzaam bu kan ton hna lai pin ah America in Chin mibu zong an i tel te lai” tiah a biapeh ah a chimchih.

Salai Isaac Khen le Chin upa cheukhat Malaysia ah kal ding in Chin ralzaam tonbiaruahnak an ngeih dingmi kong he pehtlai in Chin ramkulh Social Affair Minister Pau Lun Min Thang cu The Chinland Post nih pehtlaihnak kan tuah i atu bantuk in a kan leh.

“Salai Isaac Khen Malaysia kal aa timhmi le Chin ralzaam ton biaruahnak ngeih a timhmi kong hi Chinram cozah nih kan theih ko. Asinain, a kal dingmi hi Chinram cozah min in a si lai lo. Chinram cozah min in va kal ding le ralzaam pawl va ton ding khi khi cozah upadi nih a onh lo. Cucaah, amah pumpak asilole NGO bu min in a kal ko lai.”

UNHCR nih, “Chin miphun cu nan ram a tha cang i a tlung kho nan si cang, 2019 December 31 tiang lawng UNHCR card/catlap pek nan si cang lai i 2020 January 1 thawk in nan ram ah nanmah tein nan tlung cang lai,” tiah June 13 ah cathanh a chuah.

Chin party 6 nih July 24 ahkhan UNHCR biachahmi “Malaysia le India um Chin miphun cu nan ram a tha cang, nan tlung kho cang, 2019 December 31 hnu cun hlawt dih nan si cang lai” timi kongah an lungtlinlonak cathanh an chuah. +++

About The Author

Na ruahning rak langhter ve.. (Leave a comment)

%d bloggers like this: