Salai Isaac Khen Rian Aa Phuahnak Puanzar Phen Ah Biathli

Salai Tawk Tling Thang| 2018 May 18| Chin ramkulh cozah bu chungtel in Sipin Minister a simi Salai Isaac Khen cu May 17 ah Myanmar rampi President minthut in rian dinhnak capek le thanhchuah a si cang. Hi kong he pehtlai in mizapi thinlung le hmurka ah bia i alnak le ceihphaimi cu, “Rian maw an phuah, amahte in dah aa dinh” timi hi a si. Rian aa phuahnak puanzar phen ah aa thupmi biathli fiang deuh in hun zohti hna usih.

Zeitindah President Zung Nih Rian An Dinhter?
Salai Isaac Khen rian aa phuahnak kong ah Myanmar rampi President zung nih nawl an chuahmi ca zoh tikah cozah zung thil kalning in cun rian an phuak lo, amah lungtho te in rian i dinhnak a hal ruang ah dinhnak nawl an pekmi a si tiah fiangte in kan hmuh khawh.
“Ramkomh Myanmar phunghram upadi pohmah 264, pohmah then (A) le ramthen le ramkulh cozah bu upadi pohmah 52, pohmah then (B) ning in Chin ramkulh cozah bu Sipin, Electric le Industry minister Salai Isaac Khen cu amah duhningte in ramkulh minister rian in dinhnak nawl kan pek” tiah an langhter. Cucaah, rian an phuak lo, amah nih rian dinhnak a hal caah an dinhtermi a si timi fiangte in kan hmuh khawh. Asi ahcun zeiruang ah dah amah lungtho te in riandinhnak ca a tial hnga?

Hluttaw Speaker Nih Zei Bia Dah A Chim?
Chin ramkulh NLD (National League for Democracy- NLD) party haotu le Chin ramkulh hluttaw Speaker zong a simi Pu Zo Bawi nih ahlankan in media sin ah hiti in bia a rak phuan cia cang.

“7day media sin ah minister pakhat rian kan dinhter lai. Cucu aho dah a si lai timi aa fiang rih lo, a rauh hlan ah aa fiang colh ko lai” tiah May thla thawkka ah a rak chim. Cuti a chim dih hnu a thaizing ah Akonthi media sin ah Chin ramkulh minister pathum, Pu Sui Thio, Salai Isaac Khen le Pu Pau Lun Min Thang an rian thlenremh an si lai tiah a chim than. Cu dih hnu cun RFA siseh, DVB siseh, Chin media sin ah siseh minister pathum rian thlenremhnak aum lai ti lawngte in a chim cang. Media sin biachim aa ralrin ruang ah hiti a biachim aa dan lengmang nak hi a si lai tiah ka ruah. A hmasa bik a rak chimmi khi biadik bik si dawh a si ko, cu ningte in atu ah a hung tling taktak. NLD upa pakhat nih na biachim naa ralring lo tuk, a si takmi a si ko zong ah khati khan media sin ah biachim rih awk a si lo, chim lo te in na um rih awk a si, atu cu biachim van i sum deuh cang ka ti” tiah The Chinland Post ah a chim.

Hika zawn ah Pu Zo Bawi nih media sin ah a chim hmasa bikmi bia hi ruah awk tlak taktak a si. Cucu, 7Day sin ah a chimmi ‘minister pakhat a rian dinhter a si lai’ timi a si. Cucaah, Chin ramkulh hluttaw Speaker nih Sipin minister hi a hmasa papek ahcun (first priority le first plan) ahcun rian dinhter a timhmi a hun langhter ngai. Hi kong ah Chin ramkulh NLD party he aa naihniammi le bochan le zumhtlak a simi upa pahnih thum nih, Sipin Minister hi rian dinhter ding in cabinet ah an chuahpi. Minister rian thlennak sawhsawh lawng si lo in rian dinhter a um lai tiah The Chinland Post ah May thla zarhkhatnak ahkhan an rak chim bal cang.

Rian Dinhnak Catialmi Kong Keneh…
Rian dinhnak ca na tial maw tial lo timi kong ah Salai Isaac Khen nih May thla zarhhnihnak khan hitihin The Chinland Post ah a chim.
“Kannih cu mizapi nih thimmi kan si lo, cunglei upa (NLD) nih minister rian pekmi kan si. Anmah nih rian peknak nawl an ka ngaih bantuk in rian dinhternak nawl zong a kan ngaih, an nawl kan ngaih hna awk a si. Cucaah, rian dinhter a kan duh ahcun rian i dinh ding ah timhcia ka si. Rian dinhnak ca ka tial cang le tial cang lo cu bia thlithup siseh, kan chim kho lo. A rauh hlan ah na hngalh te ko lai” tiah a ti.

Hika zawn ah fiangte in kan hmuhmi cu mifim pakhat a si ve caah cunglei upa nih rian dinhter a kan duh maw duh lo ti cu fiangte in aa hngalh ve theu ko lai. Rian kan in phuah timi cu a zohchia tuk, i fahsak awktlak zong a si. Cu ruang ah rian kan in phuah timi lam hmang lo in amahte in rian dinhnak ca tial ding lam an hmuhsak i rian dinhnak ca a tialnak hi a si lai. Amah lungtho te in rian dinhnak ca a tial ruang ah President nih rian dinhnak nawl a peknak zong hi a si fawn.

Chin ramkulh hluttaw Speaker nih, “Rian a tei lomi nihcun mahte in i hngalh i ka rian ka chang bang uh, asilole ka rian ka tei lo caah ka rian in kaa din lai an ti awk a si” tiah 2018 kum thawkka ahkhan The Chinland Post ah a rak chim bal cang.

Cu he cun aa pehtlai kho tiah ka ruahmi a um. Cucu, Salai Isaac Khen nih cu lio hrawnghrang ahcun a facebook ah thazaang chiatnak kan ti lai maw, lungdonghnak kan ti lai dah, cabia pakhat a tial ve. “Ka celh ti lo tik nikhat khat ahcun ka rian hi ka chuahtak/ ka rian in kaa phuak te ko lai” tiah a rak tial. Cuti ca a tialmi cu a kong tampi ruang ah May 17 ah a hung tling taktak i President nih rian dinhnak ca a chuahpiak taktak.

Rian Dinhnak Ca A Tialmi Phen Ah…?
Salai Isaac Khen nih rian an dinhter hnu May 18 zingka ah hiti hin The Chinland Post ah a chim. “Rian dinhnak ca ka tialmi hi party nih a kan fial ruang le a kan tlerhkhonh ruang ah a si lo. Rian ka tei lo ruang le keimah kuttang ah a ummi zung vialte rian dih caan a phak tik i rian an lim hna lo ruang ah keimah lungtho te in rian dinhnak ca ka tialmi a si. A biapi in Hakha Market, Hakha Khuapi sersiamnak le Falam dinti peknak kong ah ka rian pakhat hmanh ka tlamtlinh lo” tiah a ti.

Hika zawn ah kan hmuh khawhmi cu Chin ramkulh minister le hluttaw siseh aho hmanh a rian a tlinh dihmi an um lo, an chambau cio dih ve ko. Rian tlamtlinh lo ruang sawhsawh men ah dinhnak ca a tialmi a si hrimhrim lai lo. Cun, rian tei lo ruang men ah amah lungtho te in dinhnak ca a tialmi a si hrimhrim fawn lai lo. A cunglei kan langhter cangmi bantuk in rian i din seh ti an duhpiakmi aa hngalh ruang le rian dinhter a kan duh ahcun timhcia ka si tiah a chimciami bia ningte in rian dinhnak ca a tialnak hi a si.

Phundang in kan chim ahcun zung thil kalning le riantuan ning in cun amah lungtho te in rian dinhnak ca a tial ko nain hiti catial duhnak a ngeihtertu hi rialdip maw tlerhkhonhnak (pressure peknak) a um ruang bik ah a si ko. Pressure peknak aum maw um lo ti cu a cunglei cabia vialte a relmi paoh nihcun kan i fiang tuk ko lai. Amah belte cu rian dinhter awk tlak tiangtiang le rian i dinh seh ti duhnak he ahleng in rialdipnak tuah awk tlak tiang taktak in rian a tuanmi a um ve hnga maw? Asiloah zeihmanh pressure pek awk tlak a ngeih lo ko bu ah cunglei upa nih amah rian thumh le rian dinhter an duh ruang hna ah a si hnga maw? Hi chung ah biathli tampi aa thup rih. Zei ruang ah ti ahcun rian a tei lo minister, MPs le cozah riantuan upa an tampi ko nain zei ruang ah dah amah theng an rialdip hnga?

Mizapi nih ahlankan in Hakha Market saknak, Hakha Khuapi sersiamnak le Falam Dinti peknak kong i a riantuanmi cung ah an ceihphai ngaingai cang. Ziknawh eihmuarnak a tuah i a si ko lai tibantuk tiang in an ceihphai. Rian an dinhter hnu zong ah amah Salai Isaac Khen nih Hakha Market, Falam dinti peknak le Hakha Khuapi sersiamnak rian ka tlamtlinh lo ruang ah rian ka dinhnak hi a si tiah The Chinland Post ah a hun chim taktak.

Chin ramkulh hluttaw nihhin sullam ngei lo le rian tei lo ruang sawhsawh men ah a rian dinh ding in pressure an pek lai ka zum lo. Cuti an pek sual a si ahcun Chin ramkulh hluttaw le NLD upa hna, hi kong ah an palh tuk lai. Chin miphun nih sunghnak nganpi kan ton zong a si fawn lai. Cu ti an palh sual ahcun Chin tuanbia le Chinram cozah ah aa dawh lo tukmi tuanbia an tial zong a si kho.

Cucaah, Salai Isaac Khen hi rian tei lo ruang sawhsawh men ah maw amah lungtho te in aa dinhmi a si taktak hnga? Asiloah a rian a tei lo pin ah thil dawhcah lo le ningcang lo in rian a tuanmi hna a um sual hnga maw? Rian aa dinhnak biathli le Hakha Market, Falam Dinti peknak tibantuk kong ah aa thupmi biathli hna a um sual hnga maw? Kapkhat lei in NLD upa hna nih minung pakhat thlak duh ruang ah rian aa dinh bia hna a si sual hnga maw? Hihi anmah pumpak thlaknak le soisel duh ruang ah si lo in dikfelte in Chinram thanchonak lampi kan zawh khawhnak ding le a dikfelmi ram thlenremhnak a si khawhnak ding ah aa thupmi biathli kawl le phuanchuah a hau. Chinram cozah le hluttaw nih biadik a chuahnak ding thawngfianter maw, asiloah media nih thil dik a chuah khawhnak ding kherhlai a herh. Hiti sawhsawh men cun daihter awk a tha hnga lo.

Biakilh: Hi cabia cu The Chinland Post hmuhning a silo, catialtu pumpak hmuhning le lungput a si.

Na ruahning rak langhter ve.. (Leave a comment)

%d bloggers like this: