Salai Lungthli Tum Nih Van Ram Awr A Zuamcawh Caah October 27 Ah An I Pai Lai

City Hunter| 2018 Tho 19| Chinland Paih Championship (CPC) tawlrelnak in tuahdingmi October 27 chun paih zuamnak ah CPC a dirhtu le a ngeitu a simi Salai Lungthli Tum nih Lairam paih thiam Van Ram Awr a zuamcawh caah i pai ding in lungtlinnak an ngei veve cang tiah kan theih. 

Hi kong he pehtlai in Salai Lungthli Tum nih atu bantuk in The Chinland Post ah a chim.

“Van Ram Awr ka zuamcawhnak a ruang bik cu kan pumrua le kan rihzan aa khat bakte kan si. Cu pin ah Van Ram Awr hi Lairam ah paih phun tampi a hmang khomi le a thiam bakmi a si caah zuamcawh vekvek ahcun amah bantuk minthang theng mangmang ka thimnak hi a si. Ka tei a si ahcun zeihmanh pek a hau lo. A van a that tuk sual i a ka tei ahcun ks. sing 5 (500,000) ka pek lai”.

Van Ram Awr/photo: TCP

“Atu hi kei zong paih ka cawng cuahmah ve. Amah zong nih a ka ngamh bak ve, kei zong nih ka tei hrimhrim lai ti kaa zumh tuk ve. A ka tei kho bak lai lo tiah ka ruah. Hmaizarh khi cakei ka thawn le thawn lo, paih ka thiam le thiam lo cu zapi nih nan hmuhte lai” tiah a biapeh ah a chimchih.

Zatlang paih le zuamcawh paih karlak ah Salai Lungthli Tum le Van Ram Awr cu an i pai te lai tiah theih a si.

Salai Lungthli Tum le Van Ram Awr hi hmaitonh in an hmu rih lo, an i tong rih lo. Atu bantuk an i zuamcawhmi le i pai ding in hnatlaknak a ngeihtertu kho hna anmah pahnih karlak riantuantu cu Tluang Lian Thang a si. Anmah pahnih i hmuhton lo ding in an i hrial, October 27 lawng ah i hmuh le i paih te ding khi an saduhthah a si tiah kan theih.

Van Ram Awr nih mi atengh lio/Photo: TCP

Van Ram Awr hi Hakha Khuathar a si. 2018 kum Hakha ah tuahmi Chin Miphun Ni zatlang paih ah minung 15 in tambik a teitu (a tengtu) a si. Cu lawng si lo in 2017 kum, Falam Chin Miphun Ni ah minung 24 in tambik teitu a rak si thiamthiam. 2016 in tukum tiang Kawlram ah paih in minung tambik a teitu a si. Minung 60 renglo a tei/ a tengh cang hna.

Salai Lungthlitum hi atu lio CPC ah haotu le a dirhtu zong a si. Chinland News a ngeitu le Chief Editor zong a si. Paih hi biatak te in tha a pe ngaingaimi le amah pumpak hrimhrim zong paih a zuam ngaimi a si.

A ralaimi October 27, Hakha, Khaikam Hall ah zinglei suimilam 8:00 in 2:00pm tiang Lai paih zuamnak an tuah lai. Hi paih zuamnak ah Zatlang/club paih zuamnak le minung 16 in zuamcawh paih zuamnak an tuah lai. Hi paih zuamnak caah budget ks. sing 100 hrawng dih ding in an tuaktaan.

CPC nih laksawng kan serning cu sing 50 hrawng dih in a tanglei bantuk in a si” tiah a chimchih.
1. Zuamcawh (Singkhaw) champion – taisawm le ks. sing 25
2. Zuamcawh pahnihnak – trophy le ks. sing 3
3. Zatlang champion – taisawm le ks. sing 10
4. Tam bik teitu – trophy le ks. sing 3
5. Zuamcawh paih in minung 1 tei ah Ks. 25,000
6. Zatlang paih in minung 1 tei ah Ks. 5,000 laksawng pek an si lai tiah CPC tuanvo ngeitu sin in kan theih.

Na ruahning rak langhter ve.. (Leave a comment)

%d bloggers like this: