Salai Sang Hlei Mang Thih Cu Hmailei Kan Riantuannak Tampi A Har Te Kho; Salai Ceu Bik Thawng
Salai Bawi| 2018 June 10| Salai Sang Hlei Mang cu a lu le a thluak ah thi a luhnak in June 9, sml. 10:10pm, Yangon sii-inn ah mual a liam tiah kan theih. Salai Sang Hlei Mang thihnak he pehtlai in Chin ramkhel riantuan tampi nih an lung fahnak, an ngaihchiatnak social media ah an langhter cio hna.
Salai Sang Hlei Mang thihnak pehtlai in Chin National Democratic Party in Salai Ceu Bik Thawng nih atu bantuk in The Chinland Post ah a chim.
“Amah he hin Chin Party pawl funtonnak zong ah siseh, Chin National Conference 2013 zong kan rak tuah. Cun, Miphun kongkau (ခ်င္းမ်ိဳးႏြယ္စုမ်ား ျပန္လည္သံုးသပ္ေရးေကာ္မတီ) hna kan rak dirh i kan tuanti hna. Hi rian kan tuantinak ah, anih hi tha tein khua a ruat i lungsau biatak tein Chin miphun caah rian a tuanmi a si. Hiti a kan liamtak tikah, hmailei kan riantuannak ah tam ngai a har te lai. Kan miphun caah cu tampi sunghnak a um,” tiah a chim.
“Cun Mara Party kan dirh hi kanmah holh le ca, nunphung pawl hi cozah nih a sermi cacawnnak le pengkulh kan hmuh khawhnak ding caah kan khelmi a si. Cucu, kan hmuh tikah cun Chin Miphun in a huap khomi Chin Party in ramkhel rian cu kan tuan lai tiah ruahnak sangpi a ngei mi asi. Hi bantuk bochanmi mino hna nih a kan liamtak cu a poi hrimhrim ko,” tiah Salai Ceu Bik Thawng nih a chimchap.
Amah hi Ethnic National Development Party (ENDP) ah General Secretary asi i, abikin Mara Party tiin theihmi asi. Thimnak zong ah Thantlang peng Ramkulh Hluttaw in voi 2 aa rak cuh ve nain teinak a rak hmu lo. Hringtu a pa Rev. Dr. Lian Mang zong naite ahkhan a liam.
Salai Sang Hlei Mang hi Miphun le ram zawnruahnak thinlung a ngei i, kum note asi in khua le ram miphun caah a phunphun in a nunnak le a thazaang dihlak aa pe siangmi asi hlei ah cawnnak lei zong in sangpi a ngei mi a si. Amah hi Ngaphaite khuami a si.
About The Author
