Salai Tial Cung Thang An Donnak I An Puaknak Hmanthlak 50 Le Amah Konglam

Tawk Tling Thang| 2019 March 12| World champion voihnih a co cangmi Aung La Nsang nih “The Dragon Leg” (Limkeng Ke) tiah a sakmi Salai Tial Cung Thang cu March 12 zingka ah Hakha  phan i khuami nih sunglawi taktak in an don. Cu an donnak hmanthlak 50 renglo le a mah konglam tawi The Chinland Post careltu kan in hrawmh hna.

Tial Cung Thang le Camboadia pa Rin Saroth cu March 8, Yangon, Thuwana Indoor Stadium ah zan suimilam 8:30 ah a round 3nak tiang an i thua i mark relnak in Tial Thang nih a tei. Tial Cung Thang hi Chinmi chung in One Championship-MMA ah a hmasa bik aa thuami le tuanbia thar a tialtu a si.

Teinak a hmuh hnu ah atu bantuk in a chuahkehnak khua Hakha ah a rak tlun hi a si. Hakha ah nithum hrawng a caam hnu ah Kalay lei in a kir than lai tiah theih a si.

 

Tial Cung Konglam Tawi

Tial Cung Thang a chuahkehnak cu Hakha Khuathar a si. A nu le a pa hi Pu Tawk Cem le Pi Mang Si an si. Unau chuakti khat pali an si i far pathum a ngei, amah lawng hi pa a si. 2005 kum ah Malaysia a phan. Cun, 2007 ah Syracuse, New York, USA ah an chunglingte in an phan. Hika ah high school zong a dih. Atu lio a umnak cu Florida ah a si.

Lai Paih Ah Bual A Conak

Lai paih hi vui 5 bual a co, CND le Tho Puai ah. Vuikhatnak bual a rak kiar hi kum 18 a rak si lio ah asi i 2013 ah zatlang he zuamcawh he bual a rak co. Mah kum ah Peng Awi, Kap Tawng, cun Aung Kyaw Lin a rak tei hna. 2014 ah zuamcawh ah a co than, mah kum ah cun Rung Lian Ceu, Mang Cung Lian, Tial Uk, cun Kap Tawng a rak tei hna. 2017 ah heavyweight timi ah bual a co than. Cun 2018 ah middleweight ah a co than.

Wrestling Ah Champion A Conak

“Lai paih hi ka kal tak bal lo nain kei cu ka ngakchiat tein USA wrestling kha a rak i thua zungzalmi ka rak si i New York State Championship zong vui 2 ka rak si. BJJ Brazilian jujitsu zong ah blue belt ka si” tiah Tial Cung Thang nih The Chinland Post ah a chim.

“A dang lente kaa celh ruang ah hin midang bantuk in kaa Pai kho lo i a si. Lai paih cu kaltak awk tha mi asi lo. Kan nunphung pei asi cu. Hmailei zong ah paihnak um ah cun kaa pai than ko lai” tiah a chimchap.

March 8 zan ah ramkip in puai 14 an i thua. Puai 3nak ah Bozhena Antoniyar (Myanmar nu) le Malaysia nu Audreylaura Boniface cu Atomweight level in an i thua i a round 2nak ah Myanmar nu nih a tei. A puai 8nak ah Tial Cung Thang le Cambodia pa Rin Saroth hi Catch weight (68,0KG) level in an i thua I Tial Cung Thang nih a tei. A puai 13nak ah Phoe Thaw (Myanmar pa) le Indonesia pa Yohan Mulia Legowo he Featherweight level in an i thua lai rih lai.

Hika ah March 8 zan aa thuatnak video tlingte in zoh than khawh a si.

Leave a Commnet

%d bloggers like this: