Sami in Paletwa ah eidin phanhpi ding an i zuam cuahmah

0

TCP Hakha| 2020 April 11 – Paletwa ah rawl eidin awk a har cang caah Sami lei in Paletwa ah phorh le phanhpi ding in an i zuam cuahmah tiah kan theih.

“Nizaan ahkhan, Paletwa in Sami ah mawtaw pakhat kan kal ter. Zahan zaan ah khan tluang tein Sami khua an phan cang tiah thawng a kan thanh” tiah Paletwa khuami riantuantu pakhat nih the Chinland Post ah a chim.

Atu lio Paletwa lei in an i timhlamhnak hi Hakha Mino phu nih Paletwa ralzam mi Sami khuasa mi hna caah bawmhnak pek an i thawh kong an theih caah Sami khua in Paletwa ah eidin luhpinak a lam an timh hi a si tiah kan theih.

“Hakha lei in mino phu nih herhhai bawmh ding an hun i thawh tiah kan theih khan, Paletwa in Sami lei ah mawtaw pakhat kan kalter. Sami in facang tun 50 tal a phor kho hnga maw timi ruahnak he kan kalternak cu a si. Paletwa in Sami zong hi a phan kho lai kan ruat lo. Nain, zahan ahkhan Sami dam tein an phan cang ti kan theih” tiah Khumi Baptist Association in upa pakhat nih the Chinland Post ah a chim.

Paletwa tiang ah bawmhnak phanhter hi a har ngai ngai. Atulio AA le Kawl Ralkap an i kahnak ruang ah, Paletwa khuapi ah eidin le herhhai phanhpi hi a har ngaingai. A bik in, AA le Kawl Ralkap nih, Tilam he Tlanglam he an kham tiah kan theih.

Paletwa khuapi pehtlaihnak ah Lampi a simi, Tilam cu Rakhine ramkulh i Kyauktaw in lawng in Paletwa ah kal a si. Nain, cu lampi cu AA le Kawl ralkap nih an kham tiah kan theih. Hihi an kham hi, Feb. thla dongh ah fak ngai in an kham i, April thla thawk ah, kap hnih in fak chinchin in an kham tiah theih a si.

“Paletwa in Sami cu dam tein an phan cang. Paletwa ah eidin awk a har tuk cang ruang ahhin, Sami ah a phan cangmi bawmhnak facang pawl hi tun 50 tal an phor kho hnga maw timi ruahchannak he Paletwa in Sami lei ah Mawtaw kan kalternak cu a si. Thaizing hi, Sami in Paletwa lei ah mawtaw nih facang cu a phorh lai, dam tein an phan kho te hnga maw timi bel kan hngal lo” tiah Paletwa biaknak lei tuanvo ngeitu pakhat nih the Chinland Post ah a chim.

Kawl Ralkap le AA an i kah ruang ah, Paletwa khua chung ah zei thil hmanh an luhpi khawh lo ruang ah thil man vialte a kai dih i, facang tun khat ah, 100,000 MMK tluk a phan cang tiah theih a si. +++

About The Author

Na ruahning rak langhter ve.. (Leave a comment)

%d bloggers like this: