Saw PDF Nih CDF-Kanpetlet Chungtel 2 An Velh Hna, Fak Ngai In An I Hliam

The Chinland Post | 2023 September 26 — Chinland Defense Force – Kanpetlet chungtel 2 cu Saw PDF B03 nih anmah le anmah theih lo tiang in an velh hna caah an i thlop lio tiah theih a si.
“Thil sining a fiang in theih a si lo. Zaan ah an velh hna. An dirhmun hi a fiang lo. A fak ngai in an tuar i sizung ah an kalpi hna” tiah a chim.
A luancia September 23 zaan sml 7:00pm hrawng ah Saw peng in Kanpetlet khua lei an kir lio lampi ah an velh hna hi a si tiah CDF-Kanpetlet chimphuannak nawl ngeitu nih The 74 Media ah a chim.
Cubantuk in an velh hna ruang ah CDF-Kanpetlet chungtel 2 an lu kuai i fak ngai in an i hliam caah atutiang an i thlop lio a si tiah a chim.
Saw PDF le CDF-Kanpetlet hi hawikomhnak a ngei mi an si caah zeiruang dah atu bantuk in an velh hna ti cu a fiang in theih a si rih lo tiah a chim.
“Anmah lei nih biaruahnak zong an rak kan tuah lo. Zeiruang ah an velh hna ti cu theih a si lo. Anmah phu he hawikom kan si” tiah a chim chap.
Cu kong he pehtlai in Saw-PDF B03 cu The 74 Media nih an chawnh ko hna nain an pehtlai kho hna lo tiah a langhter.
Magway ramṭhen, Yaw hmunhma, Saw peng hi Chin ramkulh thlanglei, Kanpetlet peng he aa pehtlai i Saw khua le Kanpetlet hi meng 12 hrawng aa hlat.
Saw-PDF chungtel pawl nih Saw-Kanpetlet lam a umkal mi mipi pawl kha atu le atu an velh tawn hna tiah khuami hna nih The 74 Media ah an chim.
Cu lam ah Saw-PDF nih Kanpetlet mipi pawl le CDF chungtel pawl velhnak hi voi 10 nak tlawm lo a cang tiah Kanpetlet Voice nih a langhter.