Selfie Thlak Ruang Ah Minung 259 Renglo An Thi Cang

City Hunter| 2018 Tho 8| Tih a nung tukmi selfie thlak ruang ah 2011 October in 2017 November tiang kum 6 chung ah minung 259 an thi cang tiah an thanh.

New Delhi hrambunh Medicine College pakhat a simi All India Medicine Science sianginn nih hlathlainak (research) ah an hmuhchuahmi cu July-August thla chuak innchungkhar le mizapi ngandamnak Journal pakhat ah an langhter.

Selfie ruang i a thimi lakah pa hi zatuak 72.5% le nu hi zatuak 27.5% an si. Selfie ruang ah a thimi tamdeuh hi zatuak in kum 22.94 a si i a tam u cu kum 20 in kum 29 kar an si. Zatuak 36% hi kum 10 in 19 kar an si.

Selfie thlak ruang ah an thihnak a ruang bik cu Selfie an i thlaknak ah motor pah, tilak ah tlak, cung sangpi in tlak hi an si. Selfie ruang ah a thimi hi 2011 kum ah minung 3, 2016 kum ah 98 le 2017 kum ah 93 an si. 2018 kum ahhin cun a let in an karh lai tiah an ruahdamh.

Selfie ruang ah a thimi tambik ram cu India, Russia, American le Pakistan an si. Hlathlainak tuahmi ah fimthiam sang hna nih khualtlawnnak hmun ah Selfie i thlaklonak ding hmunhma tuah ding in ruahnak an pek hna.
Ref: Duwun

Na ruahning rak langhter ve.. (Leave a comment)

%d bloggers like this: