Senator Smith Chin Ramkulh a voihnih tlawnnak tlamtling in a lim: Australia cozah sin ah a chim colh lai

0

The Chinland Post – Hakha, 2020 January 8| Chin miphun a dawtu Australia ram in Senator Dean Smith nih Chin Ramkulh a voihnihnak 2020 January 1-5 a tlawnmi tlamtling tein a lim hnu ah, Yangon lei ah a kir than cang. Tutan i, a tlawn hnawhchan simi le hmuhtonmi vialte chung in a biapimi thil pathum cu cozah sin ah 2020 Februray thla chung ah a chim colh lai tiah theih a si.

Senator Dean Smith nih tutan Chin ramkulh a tlunnak kong he pehtlai in, a biapi ah a chiahmi thil phun thum a chim;

“A pakhatnak ah, Australia ah khuasami Chin miphun le a dang tlangcung miphun nih rammi sinak (citizenship) kong ah harsatnak an tonmi ah thilfiang theih duh siseh, a pahnihnak ah Australia nih Ramkomh Kawlram cozah sin ah Fimcawnnak le Remdaihnak caah bawmchantu a sinak in hlathlai ding le aa thleng cuahmahmi zauk phung lamthluan ah nuhrin covo upatnak, biaknak zalonak le a dangdang thanchonak kong ah ngiathlai le hlathlai in hngalh deuh ka tim” tiah mizapi tonpumhnak Kalay siseh, Hakha ah cozah upa he tonak le zatlang hruaitu hna sin ah chimfiannak a ngei.

Tutan, Senator Dean Smith nih Chin ramkulh a hun tlawnnnak kong he pehtlai in, a rak tlunpitu simi Pu Renny Ceu Lian Mang nih The Chinland Post ah hitin a chim.

“A bik in, Australia a phan cangmi hna nih rammi sinak (citizenship) kong he pehtlai in harsatnak kan tonmi hi tawlrel a duh. Cucu, amah pumpak nih thil sining taktak fiang tein theihhngalh a duh caah Chin ramkulh a tlawn than hi a si. Tutan, a hmuh tonmi chung hin Australia cozah sin ah chimrelnak ka ngei colh lai tiah a chim”

Chin ramkulh cozah hna nih Australia ram le a dangdang ram hna ah khuasami cu laihlum Chin miphun hna caah a biapi tuk mi an si. Australia rammi sinak (citizenship) kong ah harsatnak an tonmi ah Chin ramkulh cozah siseh, aa pehtlaimi cozah zung riantuan tu dangdang nih kan si khawhnak kip in bawmhchan ding ah timhcia kan si ko tiah Senator Dean Smith sin ah an chim.

Senator Dean Smith & Minister Soe Htet

Senator Dean Smith le Mizapi tonnak kip ah, Laihlum upa hna nih an halmi cu amah nih a rathnawh chanmi chung in Australia ah Chin miphun rammi sinak he pehtlai in a si.

Hi kong he pehtlai in, Senator Dean Smith nih, “Australia ram chung ah kum fatin in vawlei ram zakip in Rianthiam, Zungthiam, fimcawng tbk. hna cu an lut. Cun, chungkhar iton thannak in Ralzam le chungkhar hna zong ram kip in an lut. Cucu, a hlei in vawleipi nichuah laifang (middle east) in Arab ram lei in an hun luh tik ah, zeibantuk dah an si, zei bantuk ningcang (background) ngeimi dah an si, mitha maw mitha lo tbk. kha kan cozah nih hngalh theih a duh hna caah phungthar a hun chuah. Cu nih cun, mi cheukhat caah Rammi sinak (citizenship) hmuh a hun har ter. Cucu, felfai tein hngalh khawhnak ding caah pumpak sinak catlap (identity) kha biapi ah a hun chiah. Cu nih timh lomi Ralzam in a rak phanmi Chin miphun hi an hursuan hna i, nan ton vemi a si. Cucu, Australia cozah sin ah, nan ram sining le nan ram ah hi bantuk catlap hi felfai tein ngeih le ngeih lo, fimtawl le kenkawi a sinak kong ah hngalh fiannak in kan cozah sin ah fianternak chim ka duh. Cucun, kan cozah nih Chin miphun nan kong le Kawlram kong fiang deuh an hngalh hnu ah Rammi sinak (citizenship) kong ah a fawizaan deuhnak hnga ding hi a si” tiah tonnak kip ah a chim.

Senator Dean Smith le Hakha Zatlang Bu Upa cheukhat

Tutan, Chin ramkulh a tlawnnak ah a biapi in Yangon, Kalay, Bungzung le Hakha ah mizapi he biaruahnak a ngei. Australia in Yangon ah a phanh in LBC Center ah, Yangon khuasa Laimi kan pa le he tonnak a ngei. Cun, Yangon cozah chung lutlai tuanmi cheukhat he zong tonnak an ngei. Yangon in Kalay a phanh ah, Salem Baptist Church nih donnak an ngei i, mizapi he tonbiaruahnak zong a ngei hnu ah, Bungzung khua in Hakha lei ah a lan tiah a rak tlunpitu upa Pu Renny Ceu Lian Mang nih The Chinland Post ah a chim.

Senator Dean Smith a voihnihnak Chin ramkulh a tlawnnak ah a hlei in a tawlreltu hi Chin Human Rights Organization (CHRO) an si i, Australia Chin Federation (ACF) hruaitu upa si hna seh, Global Chin Christian Federation (GCCF) in upa hna nih an hun zulh.

Chin ramkulh an um chung ah, Chin ramkhel phu, cozah lutlai upa chung in Advocate General (Sihni Lutlai), cozah chimrelnak nawl ngeitu, biaknak hruaitu upa, zatlang bu le media phu hna he tonnak a ngei kho. Chin ramkulh ah tonnak a ngeihmi chung in a biapimi thil pathum cu Yangon ah ummi Australia Ambassador nu le riantuantu pawl sin ah chim relnak zong an ngei tiah theih a si.

About The Author

Na ruahning rak langhter ve.. (Leave a comment)

%d bloggers like this: