Senior General Min Aung Hlaing Telh In Ralkap Lutlai 13 Tazacuaipiak Ding Ah AI Nih Nawlnak An Tuah
City Hunter| 2018 June 27|Rakhine ramkulh ah a cangmi nuhrin covo buarnak he pehtlai in tuanvo ngeitu ralkap lutlai Senior General Min Aung Hlaing telh in ralkap lutlai minung 13 cu ICC (International Criminal Court) biaceih zung nih dantat tazacuai piak ding in forhfialnak cathanh pakhat Amnesty International (AI) nih June 27 ah an thanhchuah.
Hi cathanh cu, “zeizong vialte kanmah nih kan hrawh dih lai. Rakhine ramkulah ah minung sinak a dohkalhtu lainawnnak he pehtlai in tuanvo ngeitu ralkap (“We will destroy everything: Military responsibility for crimes against humanity in Rakhine state, Myanmar”) tiah min bunh in Myanmar ram tu lio thil sining pawl hlathlai dantat piak ding ah ICC (International Criminal Court) biaceih zung ah kuatpiak ding in nawlhalnak an tuah.
Cahmai 200 tluk aa telmi cathanh ah Senior General Min Aung Hlaing cu Rakhine ramkulh ah a cangmi thahnawnnak, thlanglamhnak, tlaihhremnak, thawldawinak, tibantuk lainawnnak he aa pehtlaimi pawl khamnak le sualnak a tuahtu pawl dantatnak tuah lo in a rian a tlolh tiah an langhter.
Dantat, tazacuai piak ding in nawlhalnak an tuahmi minung 13 cazin cu;
1. Senior General Min Aung Hlaing,
2. Vice senior general Soe Win,
3. Lieutenant General Aung Kyaw Zaw,
4. Major General Maung Maung Soe,
5. Brigadier General Khin Maung Soe,
6. Brigadier General Maung Maung,
7. Brigadier General Than Oo,
8. Brigadier General Thura San Lwin an si.
9. Major Thant Zaw Win,
10. Major Aung Myo Thu,
11. Border Guard Police Officer Tun Naing,
12. Border Guard Police Officer Kyaw Chay,
13. Staff Sergeant Ba Kyaw le
Cathanh ahcun Myanmar cozah nih Rakhine ramkulh thil cangmi kong ah a luancia thla ah khan hlathlaitu commission an ser, tuahkel bantuk in cozah le ralkap hruaimi hlathlaitu phu hna hi minung lo lo in ralkap tuahsernak thuhnawhnak caah sermi a si. Atu cu tuanvo ngeitu hna runvengtu ding cu bantuk zuamnak cu ramkip nih i zumh awk ah aa tlak ti lo, fakpi in dantatnak a tuah pin ah UN Human Rights Couoncil zong nih ramkhel aa celhmi a ngol i Myanmar ram kong hi ICC biaceih zung ah a kan kuatpiak ding, nawl a pek ding a caan a phan cang tibantuk in an langhter chih.
Myanmar –Bangladesh ram ah thla 9 chung hlathlainak tuah a si i June 27 nithla khenh in chuahmi AI cathanh ah Myanmar ram kong hi ICC biaceih zung ah tazacuai piak ding in nawlhalnak an tuah. Cu pin ah ARSA hriamtlai phu ningcanglo cawlcanghnak a dikthliar zong cathanh ah an langhter chih.
A luancia August thla ah Rakhine ramkulh thil cang le buainak ruang ah ralzaam sing 7 (700,000) renglo Bangladesh ram ah an i dor tiah UN le ramkip Nuhrin covo bu nih an thanhchuah.
AI phu in hlathlaitu a tuahtu lutlai Laura Haigh nih August thla i thilcang buainak ah Myanmar ralkap, humhimnak tuanvo latu palek chungtel hna nih Rohingya cung ah timhciammamte in thlanglamhnak an tuahmi a ing tuartu hna pumpak biahalnak tuahmi cung in cathanh kan chuah hi a si tiah a chim.
Cu pin ah Rakhine ramkulh buainak ruang ah sualnak a tuahtu tampi an um rih. Rakhine kongkau lawng si lo in Shan, Kachin ramkulh zong ah tlangcung miphun zatlang mizapi cung ah ralkap le humhimnak tuanvo latu palek nih sualnak an tuahmi le nuhrin covo an buarnak tampi a um rih ti zong Laura Haigh nih a fianter chih.
Ref: RFA, BBC
About The Author
