Shwebo Pyu Saw Htee Sakhan Kahnak Ah Ralhrang 9 An Thi, Meithal 3 Le Hriamnam Tamngai An Lak
Salai Mangpau | July 23, 2023 — Sagaing ramthen, Shwebo peng Naungbinhla i Phusawtee sakhan kahnak ah ralhrang le Phu Saw Htee phu in mi 9 an thi, Meital zun 3 telh in hriamnam tampi kan lak tiah Shwebo peng Mipi ralkap nih thawngthanhnak a tuah.
July 23 zing 3:00 ah ralkap thazang 25 hrawng umnak Naungbinhla khua Pyu Saw Htee sakhan minute 20 kahnak ah ralhrang lei mi 9 an thi. An meithal zun 3, kuan tampi le ralkap thilthuam 7 cu mipi ralkap nih an lak piak khawh hna tiah theih a si.
“An sakhan cu kan lak kho lo. Khua in chaklei ah camp pakhat a tang rih. Mah lei ah Naungkine Pyu Saw Htee he aa naihnak in ralhrang nih hriamngam in an vun bawmh hna. An sakhan um ralhrang a thi lo cu chaklei khua ah an tli/zaam dih” tiah mipi ralkap lei nih media ah an chim.
Kahdohnak ah aa telmi mipi ralkap phu cu, Shwebo peng PDF, Shwebo Justice Force, Shwetawta bu, Kyarpiang bu, Shwebo taikne no. 3 bu le Tabeyin peng PDF le phu 5 tamrual fonh in kahdohnak an tuah tiah theih a si. Mipi ralkap lei a thi mi le hliamtur um lo tein him tein hnu an pil dih kawh.#
