Sianghleirun Siangngakchia Paoh Nih Scholarship Sok Cio Khawh A Si

City Hunter | 2018 July 20| Tangka chawva tlamtlin lo ruang ah pehzulh in sianghleirun kainak ding chambaunak le harnak a ngeitu hna caah bawmchantu si ding in rampi cozah nih fimcawnnak caah bawmhnak (scholarship) an pek. Harnak le chambaunak a ngeitu sianghleirun siangngakchia paoh nih sok khawh a si.

Bawmhnak pek dingmi siangngakchia milu zat hi rikhiah a si, bawmh awk ah aa tlak bikmi siangngakchia hna kha thim in bawmhnak pek an si lai. Hi bawmhnak cu thlakhat ah ks. 30,000 lengmang pek an si l ai. Bawmhnak pek ding cu a tanglei bantuk hrambunh in thim an si lai.

1. Thlahlawh tlawm rampi cozah riantuantu fanu, fapa hna le sifah ruang ah sianghleirun fimnak pehzulh cawnnak ding harnak a ngeimi a si lai.
2. A sifak ciociomi siangngakchia an si ahcun cathiammi kha papek an si lai.
3. Hringtu nu le pa le mah pumpak zong Kawlram mi sinak ngeitu an si lai.
4. Hi bawmhnak cu innchungkhar pakhat ah minung pakhat lawng bawmhnak pek a si lai.

Hi bawmhnak a hmutu hna caah rikhiahmi zulhphung cu;
1. Hi bawmhnak cu camipuai a sungh lo ahcun degree a laak tiang pehzulh in bawmhnak pek an si lai.
2. Camipuai a sungh ahcun bawmhnak pekmi ngol le pek ti lo a si lai.
3. Camipuai a hung awn than tikah hi bawmhnak cu a sok than khawh lai.
4. Sianghleirun, degree college le college sianginn aa thial ahcun a sining dirhmun hoih in tuaktaanpiak a si lai.
5. Hi bawmhnak pekmi hna cu sianginn chung ah buainak, rampi caah sunghnak, ziaza thatlonak le sualnak an tuah ahcun bawmhnak pekmi ngolpiak a si lai, pek ti lo a si lai.
6. Hi bawmhnak a ngah i pehzulh in bawmhnak pek a hauh ti lo ahcun bawmhnak pekmi ngolpiak a si lai.
7. Bawmhnak a ngahtu nih sianginn a dih tikah rampi nih a herh ahcun rian ka tuan lai tiah biakamnak min a thut lai.
8. Bawmhnak hmuh a duhtu hna caah zulhphung tuahmi ka cohlan tiah biakamnak min a thut lai.

Hi fimcawnnak ding bawmhnak (scholarship) sok a duhtu hna nih sianghleirun soknak cabawm ah aa telmi scholarship bawmhnak form cu mah le umnak penguk (General Administration Department) zung ah kuat/ap a si lai.

Penguk zung (GAD) nih a herhning bantuk in a chekhlat lai i fimcawnnak zung hrampi- Yangon zungthen ah dengteo in an kuat lai.
Ref: EDGE

Na ruahning rak langhter ve.. (Leave a comment)

%d bloggers like this: