Sianginn Sang Nih Anmah Thazaang In Sianginn Sakmi Hunnak An Tuah
Salai Elvis| 2018 June 9| Thantlang sianginn sang nih anmah thazaang le sangmi tangka thawh in ruahchannak he sianginn an sakmi cu cozah nih phungning tein a hngalhpi cang hna i June 8 ah sunglawi ngai in hunnak an tuah.
Hi sianginn cu siangniamruun then (aa-ma-kah khuai) a si i KG in tanghnih tiang tukum thok in an kai cang lai.
“Mah sianginn ah cachimtu ding BEHS No.1 saya te minung 2 pek chung an si lai ka zumh i a herh ningin tawlrelpiak le hi sianginn a tlamtlin nakhnga ca le duhsah in taangkhat hnu taangkhat a kai thluahmah mi a si khawhnak ding caah tuanvo kan ngei dih. Hi sianginn a tlamtling thlu rih lo mi a vam, tinbawsii thuh ding, sianginn area kulh nak thirsur le a dangdang caah kan hawi le zung dang he i bawm in fund kawlpiak le keimah pumpak zong nih thazaang kan chuahpi hna lai. A ra laimi Budget kum zongah halpiak kan zuam hna lai” tiah Thantlang penguk zungbawi U Swam Htet nih sianginn hunnak tuah lio ah a chim.
Thantlang peng fimcawnnak zungbawi nih hi sianginn ah cachimtu saya te minung pahnih cu BEHS No.1 sianginn saya te chung in pek chung an si lai nak kong, Thantlang peng chungah cachimtu saya an i tinzawh lo nak le forhfial biachimnak a ngeih hna.
Hi sianginn cu sianginn sang hmunthar samhmi Lungler lam kam ah a ummi a si i hmunthar inn 95 tluk an sak cang i siangngakchia tangli tang minung 40 renglo an umnak hmun a si.
Mah sianginn hi Thantlang khuachung sangthen sianginn sang nih anmah minung thazaang le ks. 5,631,800 dih in an sakmi a si. Thantlang pengah siangniamruun then (aa-ma-kah khuai) sianginn cu tukum chungah cozah nih a thar 3 an pek hna i a zapi siangniamruun then sianginn 5 a um cang tiah theih a si.
