Sing 60 Dih In CPC Nih Hakha Ah Futsal League An Tuah Lai

Salai Cung Cung | 2018 November 7| CPC (Chinland Paih Championship) tawlrelnak in Hakha ah Chinland Futsal League cu Sing 60 dih in December 10 in 20 tiang an tuah lai. Hakha peng le Thantlang peng khuate zong i tel khawh dih a si tiah kan theih. 

“Hi Futsal zuamnak ahhin luh man ah Hakha le Thantlang um team cu Sing 1 (100,000) si lai. Khuate lei in a rami pawl cu 50,000 si lai. Hi kan tuahnak a ruang bik cu kan mino pawl hi anmah le an huammi thil an tuahmi ah an bat man hmuh hna seh. Cun rian ngei lo in a um sawhsawhmi zong thathnemnak um lai ti ruahchannak le hmailei ah thangcho chin hna seh mah le thiammi tein pawcawnnak tiang hmu kho hna seh ti ruahchannak he kan tuahmi si. Paih lawng si lo in pumpululh chuih thiammi zong tampi chuak hna seh ti kan duh caah tu bantuk in kan tuah hi a si. Hi pumpululh chuih zuamnak cu man lo in zoh si lai lo. A ruang cu zuuri buaibai mi an um sual lai ti kan phan caah lungfim tein tangka pek bu tein zoh si lai. Zoh man zeizat si lai ti a fiang rih lo” tiah Salai Lung Thil Tum nih The Chinland Post ah a chim.

Hi zuamnak ah Champion laksawng ah sing 30 le champion trophy, 2nak caah sing 10 le 3nak caah sing 5 pek a si lai. Cun, thiamhlei ‘best player’ laksawng zong a um lai. Futsal team vialte caah luhman a um, Hakha le Thantlang hrambunh team caah sing 1 a si lai. Khuate in a rami team caah 50,000 lawng a si lai. Khua pakhat team ah khua dang celhthiam telh a ngah lo, CFL theihpinak in i cawk lawnglawng a ngah lai. Team tamtuk cohlang khawh a si lai lo caah luhman a pe hmasa team paoh cohlan hmasa a si lai. Khuate in a rami team papek an si lai tiah kan theih.
Hi futsal pumpululh chuih zuamnak ah team khat ah minung pasarih in chuih a si lai i pumpululh chuihnak ding cu Vuantumang certual ah a si lai tiah kan theih. +++

Na ruahning rak langhter ve.. (Leave a comment)

%d bloggers like this: