Singapore ram ah Covid-19 zawtnak a karh; Thailand ram tumlei a panh

0

Singapore cozah Ministry of Health nih April 22, 2020 thawng a thanhmi ah Covid-19 zawtnak a ngeimi minung 1,016 an hmuh chap hna. Covid-19 in zawtnak ngei mi 10,141 an si cang caah Singapore hi Southeast Asia ram chung ah Covid-19 zawtnak a karh bik nak ram ah aa chuah.

April 22 i zawtnak thar an hmuhmi 1,016 chung ah minung 15 lawng hi Singapore rammi an si i a dang paohpaoh cu Singapore ah rian a tuanmi ramdang mi lawngte an si. Nihin tiang ah a thimi minung 11 an si i a dam than mi 839 an si.

Nizan April 21 – nikhat lawng ah Singapore ah mizaw 1,111 an hmuh hna i minung 20 lawng Singapore rammi an si i a dang paohpaoh cu riantuan in Singapore ah a ummi ramdang mi lawngte an si. Ramdang mi hna sin ah a karh tuk nak a ruang cu taih-khaan ngan ah tampi in an um caah fawite in an i chawnh hi a si tiah Singapore cozah nih a thanh.

Atu bantuk in zawtnak a karh ruang ah Cozah nih riantuannak sehzung le company cheukhat cu June 1 tiang hun rih lo ding in thawng a thanh.

Southeast Asia ram ah Covid-19 zawtnak an hmuh hmasa bik nak Thailand ram tu cu tum lei a panh. April 22 ah mizaw thar 15 an hmuh. April 20 ah minung 27, April 21 ah minung 19 tiin tum lei a panh tluahmah. Nihin tiang minung 49 an nunnak a liam.

Nihin tiang Thailand ah Covid-19 in zawmi 2,826 chung ah minung 2,352 an dam than cang i, siizung ah thlop liomi mizaw 425 an tang rih. Thailand ram ah Covid-19 zawtnak an doh kho ngai cang nain Cozah nih zan chuah lo nawl (curfew) kan tuahmi cu kan ngol rih lai lo, thil sining an dothlat rih lai tiah a ti.

April 22 tiang ah Jonhs Hopkins University cazin ning ah vawleicung in Covid-19 zawmi dihlak 2,567,327 an si i a thimi dihlak 177,521 an si cang.

Ref: Channel News Asia, Bangkok Post

About The Author

Na ruahning rak langhter ve.. (Leave a comment)

%d bloggers like this: