Sipin Chairman Hlun Nih Pago Ramthen Chief Minister Telh In Minung 8 Taza A Cuai Hna
TCP-Hakha| 2019 May 21| Pago ramthen chief minister le ramthen cozah bu in minister pahnih telh in cozah riantuantu minung 8 cu Tharyawaddy peng Sipin Chairman hlun nih ramkomh tayar hluttaw zik sin ah taza a cuai hna.
Tangka ningcanglo in a hman ti in a rian (rank) in phuah a si caah cuti sualpuhmi cung ah ramthen cozah nih sermi chungtel phu minung 5 aa telmi a hmasa bik hlathlaitu phu nih amah cu upadi he aa tlak in lehrulhnak, tette chuahpinak nawl pe lo, kapkhat lei lawng in biakhiahnak an tuah tiah Sipin Chairman hlun U Kyaw San Aung nih a chim.
“Tangka ningcanglo in ka hmanmi a um lo. A um lonak a ruang tette pawl zong ka ngei. Ningcanglo in hmanmi ahmuh (case) a si lo ti hngalh ko bu le tette pawl um ko bu in keimah rian phuahnak ca ah ningcanglo in a hman ruang ah a rian in kan dinhter timi sullam a ngeihter. Hihi keimah caah tuanbia tha lomi a si” tiah a chimfian.
Cuti sualpuhmi cung upadi he aa tlak in hlathlainak tuah lo in Pago ramthen cozah nih upadi rilonh in rian an tuan ruang ah ramthen cozah bu Chief minister, Lei- Seemaing le Sipin minister telh in a hmasa bik hlathlaitu phu minung 5, an zapi minung 8 cu ramkomh Tayar hluttaw zik sin ah taza ka cuai hna hi a si tiah U Kyaw San Aung nih a chim.
Ramkomh Tayar hluttaw zik nih hi case cu criminally general case No.36/2019 in May 17 ah a cohlan cang tiah U Kyaw San Aung i sihne U Min Thet Zin nih a chim.
Pago ramthen cozah bu in Chief Minister U Win Thein nih, “khungzung ser in tuahmi a si. Minung pakhat nih tuahmi a si lo. Kanmah zong nih tette he biakhiahnak kan tuahmi a si ko” tiah May 18 ni 7Day Daily sin ah a chim.
Pago ramthen Chief Minister U Win Thein cu Chief Minister rian kum hnih chung ah rian a tuan lo tuk. A rian in kan chuahpiak she tiah 2019 January 14 ah Pago khuami 200 tluk nih lamzawh in an duhnak an langhter.
Chief Minister U Win Thein nih keimah nakin a thiam/a tha deuhmi an um ahcun Chief Minister rian ka pek hna lai tiah January 11, thawnglatu hna sin ah a rak chim bal ve.
Ref: 7Day News
About The Author
