Sipin Committee Nih Ngunkhuai Kholh Ding A Zat An Khiah, Ni 15 Chungah Lungtling Lomi Nih Ceihruahnak Tuah Khawh A Si
Hakha sipin committee
Salai Ngun San Aung| 2018 May 17| Chin ramkulh khuahlipi, Hakha sipin committee nih thlaruk chung kholh dingmi ngunkhuai phun 8 cu a zat an khiah i zapi sinah an thanh cang, a lungtling lomi nih zung ah catial in siseh pumpak kal in siseh May 17 thawk in ni 15 chung ah ceihruahnak tuah khawh a si tiah kan theih.
Hi kong ah Sipin Committee chairman Pu Khin Mg Win nih, “Thlaruk chung kholh ding ngunkhuai a zat cu kan khiah cang. Hihi a lungtling lomi nih ni 15 chung ah zung ah ra in ceihruahnak siseh ca tial in siseh lungtlin lonak langhter khawh a si. Ceihruahnak tuah dingah timhcia kan si ko” tiah TCP ah a chim.
Ngunkhuai kholh ding mi cu phun riat ah an then i a tanglei bantuk hin a si.
(1) Inn lo le vawilei hmun ngunkhuai, (2) Lam mei man ngunkhuai, (3) Hmunthur ngunkhuai, (4) Ti ngunkhuai, (5) Motor le Cycle ti bantuk ngunkhuai (Bee khun), (6) Catar (signboard) tar man ngunkhuai, (7) Sathah man (Sa lu man) ngunkhuai, le (8) Dawr, Dawrkhan, License ngei in tuahmi Khualriahbuk le rawl dawr ti bantuk pawl an si.
Democracy uknak in hruaimi ram ah mizapi nih ningcang tein ngunkhuai pek hi tuanvo pakhat hrim hrim a si i rammi nih ngunkhuai ningcang tein an pek tikah ram zong a thangcho deuh. Cun ngunkhuai rikhiah mi ah tlamtling tein a pek kho mi peng, ramkulh cu cozah nih thanchonak ca budget zong tam deuh a pek hna tiah kan theih.+++
About The Author
