Sipin Director Pu Thla Hre Cu A Rian Kong He Pehtlai In Chief Minister Nih Departmental Inquiry A Tuah
Salai Ngun San Aung| 2018 July 26| Chin ramkulh sipin director Pu Thla Hre cu a riantuannak kong ah mizapi lei kap in lungtlin lonak thil tampi an chimmi Chief Minister sin a phak caah CM nih departmental inquiry (chekhlatnak) a tuah i an chekhlatnak ca zong an chuah, Sipin Minister sin a phan cang tiah theih a si.
Amah Pu Thla Hre nih cun, “hihi ho hmanh nih hnek le fial chom ruang ah silo. Keimah lungtho tein pension ka sok mi a si. Rian ka tuan caan hi kum 40 a si cang. Keimah kum bel in cun pension lak dingah thla riat kaa duh rih. Cu a tangmi chung cu tuan ti hlah ko ning tiah pension ka sok nak hi a si” tiah TCP ah a chim.
Hi kong he pehtlai in Pu Tluang Ceu nih, “Pu Thla Hre kong hi tampi kan theihmi a si lo. Asinain Minister Isaac Khen a rian in aa dinh sin te khan amah kut tang ummi Director kha inquiry an tuah colh awk ah ka ruah. A ruang cu Minister timi cu policy a tlai mi an si i rian a tuan mi cu director le peng lutlai pawl kha an si. Cun Hakha mizapi nih hin Hakha hi hlah maw Chin ramkulh chung peng hna lak ah ziknawh eihmuar a tuah bik kan si ti tiang in an ruah ngai. Cucaah hi bantuk pawl cu inquiry tuah hna sehlaw kan sining tak tak a langh kha a tha ko” tiah a chim.
“Kan ramkulh chung ah a hrokhrol, a eihmuar bik mi Nahtahlah, Ceelet, ti bantuk mifir zung lutlai liangluang lakah kanmah Laimi nih pakhat hnih kan i ngeihchun Director hiti an tuah cu lungtling a si bak lo. Chief Minister zong Kawl mifir hi zat liangluang lak i kanmah laimi pakhat hnih te kan i ngeihchun mi mah ti tuah cu a tha lo tiah ka lungtlin lonak ka chimh len. Pu Thla Hre cu Hakha caah luhlinh bak in rian a tuan mi a si. A tu amah airawl ah mithar a rak phan lai i zeitluk in dah Hakha caah rian a tuan lai? Cun kannih Hakha cu thil tha hmu thiam loin mi that lonak hmuh kan thiam tuk. Khuacuanhnak tlang i innsang a kan sak pimi hna kha Khua nu/pa nih hi innsang kongah kannih kan i tel lo tiah ca an chuah. Zeitluk ningzak dah a si. Khua nu/pa nih Pu Thla Hre hi dirpi loin an dohkalh. Kanmah chung minung lila nih Chief Minister sinah Pu Thla Hre that lonak kong tamtuk kan chim ruangah Chief Minister nih Departmental Inquiry a tuah nak si” tiah upa pakhat nih TCP ah a chim.
Pu Thla Departmental Inquiry an tuahnak kong he pehtlai in Chief Minister cu kan ton tikah ca a chuak cang mi a si i Sipin Minister va hal uh a kan ti. Sipin Minister U Soe Thet kan hal tikah nizan lawng khualtlawnnak in ka tlung i ca zong ka rel rih lo a kan ti. Asinain Sipin Minister U Soe Thet nih thil sining hitihin a chim.
“Sipin Minister Salai Isaac Khen kha Ramri runvennak minister hruainak in hlathlai a si i a rian a tlamtlinh lo mi hmuh a si tikah dan tat ding a si. Asinain rian ka tlamtlinh lo tiin amah tein dinhnak ca a tial. Minister pakhat nih rian tlamtlinh lo ruangah dinhnak ca a tial tikah amah tlaihmi zung ah lutlai a si mi kha phung ning in chekhlat le a sualnak hmuh ahcun dantat phung hrim hrim a si. Cucaah Chief Minister nih DE a tuah nak hi a si. Mah ti cun Pu Thla Hre cu chekhlat a ton tikah ka sinah a ra i pension lak zong ka cu cang ko i chekhlat len le dantat te hna hi ka duh lo. Pension ka la lai a ka ti. July 10 ah khan a rian tuan caan kum 39 a tling i July 11 ah rian dinhnak ca a tial. A ca cu July 12 ah ka sin a phan.”
Cozah zung riantuan paoh nih an zulh dingmi zulhphung 9 a um. Cu chung in pakhat khat an buar tikah phung ning tein dan tat khawh a si. Cu he pehtlai in Minister U Soe Thet nih, “DE nih an chekhlat nak in an hmuh mi lawng a si rih i zeitin kan tuah lai timi biachahnak zeihmanh a um rih lo. Cozah zung riantuan nih zulhding mi phung 9 chung in pakhat khat paoh a pah mi a um ahcun dantat a si ko lai. Dinhdorh khawh zong a si i a fak bik mi dantatnak zong pek khawh a si. Cun hi chekhlatnak le biachahnak a dih lo hlan cu rian in dinh khawh zong a si lo i pension lak khawh zong a si lo. Cung lei upa pawl zong nih Pu Thla Hre cungah duhnak ngei in dantatnak fak pek ding cu an ruat lai ka zum lo. Cun Pu Thla Hre a rian in dinhnak ca a tial mi hi ho hnek chom hmanh a silo amah lungtho tein a si ko” tiah a chim chap.
Pu Thla Hre hi Falam ti pek nak kong, Hakha Timit Dinti kong le Market kong ti bantuk ah tluang tein tuan khawh lo mi le lim ding caan ah lim khawh ti lomi rian tampi he a si caah chekhlat a tong lengmang i dantat ding dirhmun zong a si kho mi a si caaah tu bantuk in pension a tling deuh rih lo nain a sok nak hi a si theo lai tiah anmah cozah lutlai upa chung lila zongah a ruat mi an um. ++++
About The Author
