Sipin Director Pu Thla Hre Nih The Chinland Post July 29 Chuah News Paper Cungah Fianternak Atuah
Sipin Director Pu Thla Hre Nih The Chinland Post July 29 Chuah News Paper Cungah Fianternak Atuah 17.10.2014
Salai Cung Cung + Editorial Board|2018 August 10|
Chin ramkulh Sipin Director Pu Thla Hre nih The Chinland Post July 29 chuak (Sipin Director Pu Thla Hre Cu A Rian Kong He Pehtlai In Chief Minister Nih Departmental Inquiry A Tuah) cungah biafianternak pa 6 cu a tanglei bantuk in a tuah.
1. Department Enquiry kong ah: Hi kong hi 8.6.2018 ni ah Hakha Market sak nak kong he pehtlai in Department Enquiry an ka tuah mi a si. Ka sualnak a um ah cun ka sualnak bang an ceih ko lai,ka sualnak an hmuh lo ah cun an ka luat ter ve ko lai. Keimah le theitu tette pa (5) zong atu le atu biahalnak tuah a si cang i fiang cikcek in an chuah pi cang lai tiah ka ruah.Hi kong purh dahnak an ka tuah mi hi nihin ni tiang cu ka sinah an ceihnak caa a phan rih lo.
2. Mizapi lei kap in lungthlin lonak thil tam pi an chimmi CM sin aphak caah CM nih Departmental Enquiry (Check hlatnak) atuah i an chek hlatnak ca zong an chuah, Sipin Minster sin aphan cang timi kongah
(a) Keimah hi thluakfak cikcek le lu hlinh cikcek bak in rian a tuan lio mi ka si ve, Chin ramkulh chung zongah siseh, Hakha khua ca zongah siseh ka tuan mi cungah dawtu le dohtu cu ka ngei ve ko lai minung phung a si, atlam tling mi a hohmanh kan um lo. Tahchunhnak ka chim ah cun 2014 kum ah Halkha zaalam pi (Bokyoke Road Lamthluan Lairaltili in khuathar tiang, Zahoe Road in Auto Tiang) hi det khotnak atam tuk i lam abik tuk caah keimah hruainak in khua nu\pa , Pastor le upa tampi he kan i bawm i 28 in 58 kau tiang kau ngai in kan rak kauh chap cun electric tung le Phone tung le adang dang aluat lo mi zong kan thial ter hna. Cu thil kan tuah mi cu a lung atling i akan bawmmi an tam bantukin a lungtling lomi zong an um ve i an chim a tam ngai, sehmanhsehlaw ahnu ahcun zaapi caah thiltha a si kha an mah lila zongnih an theih than veko. Mah lio ah rak kauh kho hlah usih law atu kan Cycle, Motor tam he zeidah kan lawh hnga mu, vun ruat ve hmanh u, Lam kan kuah hlan in zalampi a bit ning ka rak langter.
(b) Mizapi lei kapin lungtlin lo nak thil tampi an chim ah cun CM nih hin aka chimh colh ve ko lai tiah ka zumh. Zeicatiah cun amah hi CM a si hlan in aa dawmi le aa hngalmi te kan si caah a si. Check hlatnak Departmental Enquiry a tuah i Minister sin aphan cang timi zong hi acung lei Market kong an hmuh ning report an chuah mi hi an chim mi a si tiah ka ruah.
3. Pu Tluang Ceu nih achim mi kongah Minsiter Salai Issac Khen arian in aa dinh sin te khan amah kut tang ummi Dirctor kha Enquiry tuah colh le sining tak tak alangh kha atha ko tiah achim mi kongah
Biaknak lei Pastor pakhat zong a si i hi bantuk in fawi tein biachim hi cu atheih aa rem lo ngai tiah ka ruah, Minister a sual poh ah Director a sual ve lai ti phun deuh in biachim awk a si lo, cu ti ti ah cun chim awk tampi a um ve ko. Policy atlai mi Minister asual ning tein Director asual ve kan ti kho lai lo,Direector acham baunak a um zongah Minister palh a si kan ti kho lo, Laws, Rules, Regulations le Procedure a thei lo mi nih a thei deuh mi kha nau tat lo tein hal phung a si. Hngalh lo mi a hngal bantukin riantuan cu chuah sual afawite, Cun Halkha ah Ziknawh Ei hmuar a tam bik timi bia ruangah keimah Thla Hre theng mang thim i check ding cu adik mi thil a si hnga maw? Keimah maw misual bik ka va si hnga, check hlat an ka tuah mi kongah ka sualnak a um ah cun a phungning in dantaknak cu ara ko lai, Aho zong nih mi mui zoh dingin biachim hi kan i ral ring deuh awk a si. Hi konghepehtlai in Minister hlun he sualnak kongah pehtlaihnak zeihmanh kan ngei lo timi chimfian na duh ah cun fiang tein kan chimh khawh mi a si.
4. Falam dinti peknak le Halkha dinti peknak kong
Hi kong ah tluang tein tuan khawh lomi le lim ding caan ah lim khawh ti lo mi rian tampi he a si caah Pu Thla Hre check hlat a tong lengmang i dantak ding dirhmun zong a si kho timi bia hi a chim tu cu ka hngal lo. Falam dinti le timit dinti peknak cu kan mah Sipin kut a phan rih lo mi a si, hi kong ah cun cunglei fial mi lawng atuan lengmang mi ka si ve caah kan thei lo. Project ngan pipi hi pakhat lawng nih thil tlamtling tein tuan khawh phung zong a si lo, a cozah formed tuah mi Committee he riantuan ti a si ko caah hi kong he pehtlai in cun keimah thengte check hlatnak zong a um lo, cucaah hi kong he pehtlai in check hlatnak zeihmanh a um lo ti hi ka fianter.
5. Pension laknak ca ka pek mi kongah
Dawtu tampi nih pension laknak ka hla mi kongah aka thlauh mi zong tampi an um nain dohtu zong an um ve, minung phung a si ka ti. Dawtu hna dihlak cungah lunghlomhnak ka chim, Dohtu dang kongah chim fiannak adang tein ka tuah te lai. Sihmanhsehlaw chungkhar tling tein kan i ruah hna hnu ah pension lak dingin ca ka pek hi a si. DE tuah mi ka tih ruang zong ah a si lo,mah hlan tein pension lak hi kan i ruah cang mi arak si. Acozah kut tang riantuan pakhat ka si caah an mah nawl pek lo cun lak khawh zong a si lo, nawl an ka pek ah cun ka la ko lai. Khua le ram caah kan sikhawh tawk rian kan tuan kan ti tik ah achung um lio i tuan khawh mi le aleng phak hnu ah tuan khawh mi aa dang ve ko lai tiah ka zumh. Kei mah um lo cun a si kho lo timi lungput zong ka ngei hlei lo, kawl phungtluk bang “Mangphy um lo ah cun Mangme a ra ko lai” , vawilei cung cu a phung a si ko ka ti.
Mah he pehtlai in Media zong nih thawng nan thanh tikah fiang deuh le tling deuh in hlat hnu lawngah thawng kan thanh tawn uh. Mipi nih CM sinah an taing (report) lengmang ti bantuk zong hi ka caah a fak ngai mi a si, hi bantuk hi sources a fek deuh mi zong chuah pi khawh i zuam ve uh law ti ka duh. Zeicatiah carel tu tampi cu tial ning deuh in thil hi zumh le rel a si tik ah pakkhat khat si ning tak he aa kalh mi tete a um tik ah thanh hnawh mi pawl caah a fak deuh tawn ti in Sipin Director Pu Thla Hre nih The Chinland Post ah fianternak a tuah hi a si..
(Theihternak: The Chinland Post nih thawngpang kan tialmi cungah zalong te in aho paoh nih fianternak le hmuhning chim cio khawh a si.)
About The Author
