Siyo Project Sin In Hmuh Mi Hriamnam Pawl KNDF Battalion pali Sin Ah An Pek
Salai Mangpau | August 26, 2023 — Karenni hriamtlai ralkap caah Siyo project sin in hmuh mi hriamnam cu August 25 ni ah KNDF Command Operation 4 tang a um mi Battalion, 1,5,6,7 sin ah peknak an tuah tiah DVB News sin in theih a si.
Hriam peknak ah Operation Command 4 ralkap, KNDF Department cio in lutlai, Commander hna le Fundraise pawl an i tel kho tiah theih a si.
Siyo project hi March 20 in April 16 tiang ni 26 a rau i, mah project nih a hmuh mi Fund hi US$ 350000 leng a si. Myanmar tangka kyat sing thonghra a tlin caah mah Siyo project timh mi a phan tiah thawngzamhnak ah lutlai hna nih an chim.
2023 February, March, April thlathum chung ah Myanmar ram chung raldohnak voi (1530) a chuak. Karenni (Kayah State) raldohnak ah voi 150 leng a um i SAC ralhrang lei 1,500 leng an thi. Mipi ralkap 20 dengmang nih ram caah an nunnak an pek.
June thla chung zong ah Shan le Kayah (Karenni) ramri, Moebye kahdohnak ah SAC ralkap 20 nak tlawm lo an thi i mipi hriamtlai lei in 4 an nunnak a liam ve tiah MBPDF nih thawng a rak thanh.
2023, July thla chung lawng ah Karenni ramkulh ah kahdohnak voi 33 a chuak i SAC ralhrang lei 84 an thih leng ah 3 an tlaih hna. Cu leng ah ralhrang lei hriamthil tam ngai zong an laak khawh.
August thlachung Karenni ram Demoso le Hparuso kahdohnak ah SAC ralkap Battalion Commander telh in 70 leng an thi.
2023 kum May thla KNDF thawnhzamhnak ah Karenni ramkulh chung, kum hnih chung ah kahdohnak voi 1,000 leng a chuak i, SAC ralkap hriamngan le hriamhme zuun 600 leng an laak khawh nak kong cu Karenni National Defence Force (KNDF) nih cathanh an chuah.
