Social Media Account Phihpiak Ruangah Kawlram Cozah Nih Facebook Sin Bia A Hal Cang
TCP-Online| 2018 August 28| Facebook nih Kawlram ralkap ngeihmi Account pawl a phih khar hlan te ah, UN Human Rights Council, Switzerland ram Geneva khua i tuahmi Kawlram kong cithlattu hna nih a voi khatnak bik cithlat an tuahmi kong chimrelnak an ngei. Cithlattu hna nih an chim ning ah cun, Kawlram ralkap nih Rakhine ramkulh i an cawlcangh ning kong cu Genocide miphun hna an rak thah hna ning bantuk tiang khan tih a nungmi a si tiah an cithlatmi nuhrin covo buartu an sinak tehte pawl he an langhter.
Cucaah ralkap bawizik Sr. General Min Aung Hlaing le ralkap nih an ngeihmi Myawaddy TV Facebook Pages telh in ralkap nih ngeihmi Facebook Pages dihlak 52 le pumpak Facebook accounts 18 cu August 27, 2018 ah kan phihpiak dih hna tiah FB lei chimrel khawhnak ngeitu Clare Wareing nih a chim. Mahti Account phihpiakmi cu UN nih Rakhine ramkulh i cithlatnak an tuah i an hmuhmi kong thawngzamhnak an tuah hnu in a si.
Hi kong he pehtlai in British hrambunh Burma Campaign UK Director Mark Farmaner nih “Genocide timi cu ralkap nih timhlamhnak ngeih ciammam bu in an thahmi hna khi a si. Rakhine ram i Rohinya miphun pawl ralkap nih an thahmi hi timhlamhnak ngeih cia buin an thil tuahmi a si. An miphun kongah siseh an bikanak zong ah siseh ralkap lei nih a huat zong an huatmi a si.”
FB nih ralkap ngeihmi Account a phihmi konghe pehtlai in ramkomh president zung chimnak nawl ngeitu U Zaw Htay nih cun,
“FB nih a phihpiak ni (nizan) khan kan nih cu chawlehnak kong he pehtlai in meeting kan tuah lio a si. Kan theih tik cu down a si manh dih cang. Mah ti down a si caan cu UN fact finding mission nih report an tuah i sml. pakhat hrawng a rauh hnuah a si. Mahti down dih kong ah FB nih cun Statement an tuah i Community Standard he aa kalh ca ah a si an ti. Hithil a van can kaa hin ralkap lei zong nih bia an kan hal len. Cun, kanmah zong nih FB zunglei phone kan chawnh i Community Standard he aa kalh ca a si ti a kan leh.”
FB nih tubantuk ralkap nih hmanmi Account pawl a phih tikah cozah le ralkap kar pehtlainak hna a zor i khat le khat theihthiamlonak a um sual lai ti a phannak zong U Zaw Htay nih cun a chim chap.
Facebook nih thawng a thanhmi ah UN Human Rights Council nih, hi ralkap nih ngeihmi Facebook hna cu nuhrin covo an buartu an sinak tehte an hmuh caah a si. Cu pin ah hmailei ah Kawlram chung ah tlangcungmi he remhlonak a karhnak ding le biaknak kar huatnak a karhding khenkham a herh caah atu bantuk in phihpiak nak kan tuah hi a si tiah Facebook Website ah an tial.
Ralkap he aa pehtlaimi Facebook Pages le Account hna cu Facebook nih an phihpiak hna nain a chung i ca an tialmi le a ummi paoh cu hrawhpiak lo in an fimpiak rih ko hna.
Ref;VOA
About The Author
