South Korea He Ton Ding North Korea Nih A Thulh I Trump He Ton Ding Zong Thulh Dingin A Tlerhkhonh
Salai Aung Aung| 2018 May 16| Donald Trump le Kim Jong-un, June 12 ah Singapore ton ding mi hi US lei nih fimkhur tein an tawlrel a herh tiah a chim pah in South Korea he cawn nithum ni ton ding an i tiam cia mi zong US he raltuk cawnti nak nan tuah ruangah tiin North Korea nih an thulh tiah theih a si.
Hi raltuk cawnnak cu Max Thunder tiah a min an bunh i cucu North Korea nih cun tlerhkhonh le ngiar duh ah an tuah mi a si caah hihi kan duh lo, kan dohdalh tiah North Korea cozah thawngthanhca KCNA nih a langhter.
Hi kong ah ramdang pehtlaihnak minister zung chimrelnak nawl ngei Heather Nauert nih cun hihi US caah a biapi tuk mi a si cucu Kim Jung-un zong nih a theihthiam ko i Trump le Kim ton ding mi zong thulhnak lei zeihmanh thawngpang a um lo tiah a chim.
Hi raltuk cawnti nak cu 1953 thawk tein US le S. Korea nih hnatlaknak min an rak thut cang mi a si i ramleng ral in i runvennak caah an tuah lengmang mi a si. Sihmanhsehlaw North Korea nih cun hihi an kan ngiarnak a si tiah a ti ve.
Cawnni thum i North Korea le South Korea tonnak ahhin an pahnih kar raltuk nak a zungzal ca in dihter ding le hriamnam hrawhnak ding a bik in ceih kan i timhmi a rak si nain a tu cu kan hrawh than tiah KCNA thawngthanhca nih a langhter.
Ref: BBC, VOA
About The Author
