South Korea President Hlun Lee Myung-bak Eihmuarnak Case In Thongdan Kum 15 An Pek
City Hunter| 2018 Tho 5| South Korea President hlun Lee Myung-bak cu eihmuarnak case (ahmuh) in Seoul khuapi biaceih zung nih thong kum 15 thlak ding in October 5 ahkhan biakhiahnak an tuahpiak cang tiah theih a si.
South Korea ah ziknawh eihmuar sualpuhnak in a minthangmi ramkhel tuahtu le sipuazi tuahtu pawl thongdan peknak pehzulh in an tuah i a donghnak bik ah President hlun Lee Myung-bak zong aa tel ve.
Lee Myung-bak hi 2008 kum in 2013 tiang President rian a tuanmi a si i thongdan pek a tongmi a palinak South Korea President hlun zong a hung si.
Amah thutdan a hun changtu South Korea ram i a hmasa bik nu President Park Geun-hye zong ziknawh eihmuarnak le nawlngeihnak ningcanglo hmannak case in a zapi thongdan kum 32 tiang tla ding in bia an khiahpiak tiah theih a si.
Park Geun-hye cu a hawikom he i bawm in ziknawh eihmuarnak a tuahmi lak i aa tel ve ruang ah 2017 kum thawkka in President a sinak a rian in an thumh, an phuah.
Nihin ah thong kum 15 dan an pekmi President hlun Lee Myung-bak hi Samsung company bantuk in sipuazi rian pawl le rampi ngiatthlainak zung sin in American dollar 10 billion cu ningcanglo in a cohlan tiah sualpuh a tong.
Seoul khuapi centre biaceih zung nih Lee Myung-bak hi amah he chungkhat a simi a unau a simi private motor thilri chuahnak rian ah American dollar 21.77nuai – ningcanglo hmannak, Samsung le a dang sipuazi rian sin in ziknawh cohlannak ahmuh he pehtlai in sualnak a ngei ti an hmuh caah atu bantuk in biakhiahnak an tuahpiak hi a si.
Biaceih zung nih President hlun Lee Myung-bak cu thongdan lawng si lo in tangka zong Korea tangka in 13 billion a liam lai tiah biakhiahnak an tuahpiak chih. Kum 76 a simi President hlun Lee Myung-bak tu nih cun sual an puhmi cung ah zeibantuk sualnak hmanh ka tuah lo tiah a al ve hna.
Hiti ziknawh eihmuarnak case in chekhlat le tazacuai ka simi hi atu lio President Moon Jae-in nih ramkhel ning in lehrulh a ka duh caah a si tiah Lee Myung-bak nih a chim.
Nihin (October 5) ni i bia an khiahpiak lio caan ahhin biaceih zung ah President hlun Lee Myung-bak cu a ra lo tiah theih a si. Cozah lei sihne (judge) hna nih President Lee Myung-bak cu thongdan kum 20 pek ding in biaceih zung ah an chuahpi. Asinain kum 20 silo in kum 15 lawng in bia an khiahpiak.
Thong a tla balmi South Korea President hlun hna cu; President hlun Park Geun-hye a si. Ziknawh eihmuarnak case in thongdan kum 32 an pek. South Korea ram ah 1980 in 1990 tiang President rian tuanvo a latu ralkap bogyokegyi hlun pahnih a simi Chun Doo-hwan le Roh Tae-woo zong President rian in an i dinh hnu 1990 kumdongh lai ah ziknawh eihmuarnak le rampi leirawlnak case in thongdan pek an rak si ve. Anmah pahnih cu kum 2 chung thong an tlak hnu ah President luatdaih peknak in thong in an luat than.
Ref: Duwun